ئەندامێكی لیژنەی ئاسایش و بەرگریی لە پەرلەمانی عێراق ڕایگەیاند، بۆردوومانكردنی بارەگایەكی هێزەكانی حەشدی شەعبی لە ناوەڕاستی بەغدای پایتەخت پێشێلكارییەك بوو، كە سێ پەیامی مەترسیداری هەڵگرتبوو، لەوانە تێكدانی ئاسایشی ناوخۆی عێراق.
ئاوێنه: وەعد قەدۆ ئەندامی لیژنەی ئاسایش و بەرگریی لە پەرلەمانی عێراق لەبارەی هێرشەكەی ئەمڕۆی سەر بارەگایەكی هێزەكانی حەشدی شەعبی لە ناوەڕاستی بەغدای پایتەخت بۆ میدیا ناوخۆییەكان دەدوێت.
وەعد قەدۆ ڕایگەیاند، بۆردوومانكردنی بارەگایەكی هێزەكانی حەشدی شەعبی لە ناوەڕاستی بەغدای پایتەخت لەلایەن ئەمریكای داگیركەرەوە پێشێلكاریی سەروەریی وڵات بوو، دەشڵێت: ئێمە مامەڵە لەگەڵ دەوڵەتێكی دڕندەدا دەكەین، كە لە ئیسرائیل دڕندەترە.
ئاماژەی بەوەش كرد، بۆردوومانەكە ئەمڕۆ هەڵگری سێ پەیامی مەترسیدارە، كە بریتین لە بەئامانجكردنی بە ئەنقەستی هێزەكانی حەشدی شەعبی لەلایەن واشنتۆنەوە بە بیانووی درۆ، هەروەها هەوڵێك هەیە بۆ تێكدانی ئاسایشی عێراق و خزمەتكردنی ئیسرائیل، ئەمەش بەهۆی هەڵوێستە نیشتمانییەكانی بەغداوەیە لەسەر پرسی فەڵەستین.
ئەوەشی خستە ڕوو، دەبێت لەمەودوا حكومەت بە دوای هەڵبژاردنی ڕێگەیەكی نیشتمانیی بگەڕێت، بۆ ئەوەی هێزە داگیركەرەكان لە وڵات دوور بخاتەوە، هەروەها داوای هەڵوێستی بەپەلەی حكومەت و هێزە نیشتمانییەكان دەكات، بۆ كۆتاییهێنان بە تاوانەكانی داگیركاری ئەمریكا.
پێشنیوەڕۆی ئەمڕۆ بارەگایەكی حەشدی شەعبی لە شەقامی فەڵەستین لە بەغدا، لەلایەن فرۆكەیەكی بێفڕۆكەوان بۆردوومان كرا، دوو سەركردەی حەشدی شەعبی لە بۆردوومانەكەدا كوژراون، كە یەكێكیان حاجی ئەبو تەقوا، فەرماندەی ئۆپەراسیۆنەكانی لیوای ١٢ـی حەشدی شەعبی بوو، هەروەها شەش كەسی دیگە بریندار بوون.