قوباد تاڵەبانی، جێگری سەرۆك وەزیرانی هەرێم رایگەیاند، دەبێت لە بەڕێوەبەرایەتییەکانی گەرمیان ئاسانکاری تەواو بۆ وەبەرهێنەران بکرێت. دەشڵێت، هەر كاتێك بە پێویستی بزانین گۆڕانكاری لە پۆستە ئیدارییەكانی گەرمیاندا دەكەین.
ئاوێنە: ئەمڕۆ دوشەممەو لە دوەم رۆژی سەردانەکەیدا بۆ گەرمیان، قوباد تاڵەبانی، جێگری سەرۆک وەزیران، لەگەڵ جەلال شێخ نوری، سەرپەرشتیاری ئیدارەی گەرمیان و بەڕێوەبەرایەتییەکانی سنورە کۆبوەوە.
بەپێی راگەیەندراوێكی نوسینگەكەی، لە کۆبونەوەکەدا جێگری سەرۆک وەزیران بەرپرسانی ئیدارەی گەرمیانی راسپاد رێوشوێنی پێویست بگرنەبەر بۆ ئاسانکاری زیاتر لە جێبەجێکردنی کاروباری هاوڵاتییان و خزمەتکردنی باشتری دانیشتوانی دەڤەری گەرمیان. وتیشی: لەپێناو باشتر خزمەتکردنی هاوڵاتییاندا لە هەر کاتێکدا بە پێویستی بزانن گۆڕانکاری لە پۆستە ئیدارییەکانی سنورەکەدا دەکەن.
لە بەشێکی دیکەی کۆبونەوەکەدا قوباد تاڵەبانی ئاماژەی بەوەدا لەپێناو بەهێزکردنی کەرتی تایبەت و هاندانی زیاتری وەبەرهێنەران، دەبێت لە بەڕێوەبەرایەتییەکانی گەرمیان ئاسانکاری تەواو بۆ وەبەرهێنەران بکرێت و رۆتین کەم بکرێتەوە. وتیشی نەک هەر دەبێت ئاسانکاری تەواو بۆ وەبەرهێنەرانی سنورەکە بکرێت، بەڵکو پێویستە کاربکرێت هانی وەبەرهێنەران بدرێت لە ناوچەکانی دیکەشەوە روبکەنە ئیدارەی گەرمیان و بەشداربن لە بوژانەوەی ئابوری لە سنورەکەدا.
جێگری سەرۆک وەزیران بە بەرپرسانی ئیدارەی گەرمیان وت، پلانێکی گونجاو بۆ پەرەپێدانی کەرتەکانی کشتوکاڵ و گەشتیاری ئامادە بکەن کە لەگەڵ ژینگە و تواناکانی سنورەکەدا بگونجێت.
هەر لە کۆبونەوەکەدا پاش گوێگرتن لە داواکاری و کێشە و گرفتەکان، قوباد تاڵەبانی بڕیاریدا لەسەر چارەسەرکردنی بەشێک لە داواکارییەکانی بەڕێوەبەرایەتییەکانی ئیدارەی گەرمیان.