خولوسی ئاكار، وه‌زیری به‌رگریی توركیا، له‌باره‌ی دامه‌زراندنی ناوچه‌ی ئارام له‌سوریا له‌گه‌ڵ ئه‌مریكا رایگه‌یاند"تا ئه‌وكاته‌ی له‌گه‌ڵ ئامانج و مه‌به‌سته‌كانمان گونجاوبن، به‌رده‌وام ده‌بین له‌ دانوستان و كاری هاوبه‌ش. ئه‌گه‌ر دواخستن و سه‌رقاڵكردن هه‌بێت، ئه‌م كارانه‌ كۆتاییان دێت."

ئاوێنە: خولوسی ئاكار ئاكار، وەزیری بەرگری توركیا،  لەڕێوڕەسمێكدا لەگەڵ سەرۆك ئەركانی سوپاو فەرماندەكانی سوپای توركیا رایگەیاند، ئامانجیانه‌ ناوچه‌یه‌كی ئارام به‌قوڵایی 30 بۆ 40 كیلۆمه‌تر له‌ رۆژهه‌ڵاتی فورات دابمه‌زرێننكە چەكی قورس و شەڕڤانانی یەپەگەی تێدا نەبێت.

ئاكار وتی"له‌سه‌ر زانیاری و فه‌رمانی سه‌ركۆمارمان، مه‌به‌ست و ئامانجه‌كانمان هه‌ر له‌ سه‌ره‌تاوه‌ دوباره‌ و دوباره‌ به‌ به‌رانبه‌ره‌كانمان راگه‌یاندوه‌. رونكردنه‌وه‌كانی ئه‌مریكا له‌نزیكه‌وه‌ چاودێری ده‌كه‌ین. ده‌زانین پێشتر له‌ منبج و ره‌ققه‌ چییان كردوه‌ و نامانه‌وێت ئه‌وانه‌ دوباره‌ ببنه‌وه‌. له‌وچوارچێوه‌یه‌دا له‌و ناوچانه‌ی كه‌ هاوڕاین تێیداندا، له‌گه‌ڵ ئه‌مریكا ده‌ورییه‌ی ئاسمانی و وشكانی ئه‌نجامده‌ده‌ین و كار بۆ دامه‌زراندنی ناوچه‌ی سه‌ربازی ده‌كه‌ین. تا ئه‌وكاته‌ی له‌گه‌ڵ ئامانج و مه‌به‌سته‌كانمان گونجاوبن، به‌رده‌وام ده‌بین له‌ دانوستان و كاری هاوبه‌ش. ئه‌گه‌ر دواخستن و سه‌رقاڵكردن هه‌بێت، ئه‌م كارانه‌ كۆتاییان دێت. ئاماده‌كارییه‌كانمان ئه‌نجامداوه‌. هه‌ركاتێك پێویست بكات، وه‌ك سه‌ركۆماریشمان وتویه‌تی، خۆمان ناوكی خۆمان ده‌بڕین. پلانی B و پلانی C شمان ئاماده‌یه‌."

ناوبراو جه‌ختیكرده‌وه‌ كه‌ رێز له‌ یه‌كپارچه‌یی خاك و سیاسی سوریا ده‌گرن و وتی"ئامانجی كۆتاییمان، كۆتاییهێنانه‌ به‌ بونی په‌كه‌كه‌/په‌یه‌ده‌/یه‌په‌گه‌ له‌ باكوری سوریا و دامه‌زراندنی رێڕه‌وێكی ئاشتییه‌ تا میوانه‌ سورییه‌كانمان بتوانن بگه‌ڕێنه‌وه‌ بۆ وڵاتی خۆیان."