2020-02-15 1161
بارزانیو عه‌لاوی
مەسعود بارزانیو ئەیاد عەلاوی كۆبونه‌وه‌و له‌سه‌ر سێ خاڵ ڕێككه‌وتن.
ئاوێنه: ئه‌مرۆ شه‌ممه، لەسەڵاحەددین مەسعود بارزانی پێشوازی لەئەیاد عەلاوی‌و وه‌فدی یاوەری کرد. به‌پێی راگه‌یه‌ندراوی كۆبونه‌وه‌كه، بەوردی باس لەپێشهاتەکانی ڕەوشی عێراق‌و ناوچەکەو بابەتی پێکهێنانی حکومەتی ئینتیقالیی داهاتوی عێراق کراوه‌و هەردولا لەسەر ئەم خاڵانە رێککەوتن:
یەکەم: هەردوولا جەختیان کردەوە کە عێراق پێویستی بە مانەوەی هێزەکانی هاوپەیمانیی نێودەوڵەتی هەیە بۆ ئەوەی هاوکاریی وڵات بکەن لە ڕووبەڕووبوونەی مەترسیی تیرۆر، بەتایبەتییش بە ڕەچاوکردنی جموجۆلەکانی ئەمدواییەی داعش.
دووەم: عێراق وڵاتی فرەیی و پێکهاتەکانە و هیچ لایەنێکی سیاسی ناتوانێ لەبارەی بڕیارە چارەنووسسازەکانی دەوڵەت و داهاتووەکەی، تاکڕەوی بکات، چونکە ئەوە دەبێتە هەڕەشە لەسەر یەکپارچەیی وڵات و ئاشتیی کۆمەڵایەتی.
سێیەم: پێویستە پێکهاتەی حکوومەتی داهاتوو نوێنەرایەتی هەمووان بکات و هەموو پێکهاتەکانی عێراق بەشداریی تێدا بکەن تا یەکانگیریی نیشتمانی و خواستە ئاشتیخوازانەکانی خۆپێشاندەران و بزاڤی جەماوەری، بگرێتەخۆی.