پسپۆڕانی کاروباری ئابوری پێشبینیان کردوه لە ماوەی داهاتودا نرخی دۆلار لە بازاڕەكاندا بەردەوام بێت لە دابەزین به‌رامبه‌ر به دینار و ئەوەشیان بۆ ئەو رێوشوێنە توندانە گه‌ڕانده‌وه كه له سیاسەتی دراو لە وڵاتدا سەپێنراوە، کە بڕیارەکانی بانکی ناوەندی نوێنەرایەتی دەکات،.
بۆ یەکەمجار لە ماوەی چەند رۆژی رابردودا نرخی دۆلار گه‌یشته خوار 150 هەزار دینار بۆ هه‌ر 100 دۆلارێك، به‌ڵام له دو رۆژی رابردودا جارێكی دیكه به‌رزبوه‌وه، شاره‌زایانی ئابوری داوای به‌رده‌وامبونی بانكی ناوه‌ندی عێراق له‌سه‌ر رێكاره‌كانی ده‌كه‌ن.
هاوکات کۆمەڵەی بانکە ئەهلیەکان باس له‌وه‌ده‌كات، کە "رۆژانی داهاتو عێراق و توركیا رێككه‌وتنی نێوانیان له‌باره‌ی دابینکردنی دارایی بازرگانی دەرەکی نێوان هەردو وڵات جێبه‌جێ ده‌كه‌ن، به‌وه‌ش جارێكی دیكه به‌های دۆلار به‌رامبه‌ر به‌دیناری عێراقی داده‌به‌زێت".
مه‌زهه‌ر محه‌مه‌د ساڵح، راوێژكاری دارایی سه‌رۆك وه‌زیرانی عێراق رایگه‌یاند، پلاتفۆڕمی ئه‌لیكترۆنی بە بەردەوامی کاردەکات، بانکەکان بە شێوەیەکی شەفاف وەڵامی پێداویستییەکانی دژە سپیکردنەوەی پارە دەدەنەوە و پێداویستییەکانی کەرتی تایبەت بە دراوی بیانی بە ڕێژەی 85% بۆ پارەدارکردنی بازرگانی دابین دەکەن.
ئاماژەی بەوەشکرد، پێداویستییەکانی گەشتیاران لە دو رێگەوە دابین دەکرێن، کارتی بانکیی و دۆلاری کاش، هەروەها بانکە ئەهلییەکان دۆلاری کاشیان بۆ خۆیان هاوردە کردوە بۆ دابینکردنی پێداویستییەکانی کڕیارەکانیان لە هەژمارە دۆلارییەکانیانەوە بە بڕە پارەیەک کە لە دەیان ملیۆنی تێپەڕاندوە.
هاوكات د. نەبیل المرسومی، پسپۆڕی ئابوری به رۆژنامه‌ی سه‌باح-ی راگه‌یاندوه، هۆکاری دابەزینی نرخی دۆلار بەرامبەر دیناری بۆ چەند هۆکارێک ده‌گه‌ڕێته‌وه، دیارترینیان ئەو رێوشوێنانەن کە لەلایەن دەسەڵاتی بانكی ناوه‌ندی گیراونه‌ته‌به‌ر بە ئامانجی هەمەچەشنکردنی ئه‌و دراوانه‌ی مامه‌ڵه‌ی بازرگانیان پێوه‌ده‌كرێت، واتا مامه‌ڵه‌كردن به دراوه‌كانی یۆرۆ، درهه‌می ئیماراتی و لیره‌ی توركی جگه له دۆلاری ئه‌مریكی.
ئەو شارەزایە پێیوایە "ئەو ڕێوشوێنە دراوییانەی دیکە کە بانکی ناوەندی بۆ ئاسانکاریی پڕۆسەی چونە ناو پلاتفۆرمی ئەلیکترۆنی و هەنگاوە دراوییەکانی دیکە گرتویەتیەبەر، بەشداربون لە کەمکردنەوەی بەرزبونەوەی نرخی دۆلار له بازاڕه‌كانی عێراقدا".