عەتوان عەتوانی، سەرۆكی لیژنەی دارایی پەرلەمانی عێراق رایگەیاند، بڕیارەكەی دادگای فیدراڵی ئەوەی بەسەر وەزارەتی دارایی عێراقدا سەپاندوە كە موچەی فەرمانبەرانی هەرێمی كوردستان هاوشێوەی فەرمانبەرانی پارێزگاكانی دیكەی عێراق بدات. دەشڵێت، هەر لایەنێك ببێتە كۆسپ بۆ جێبەجێكردنی بڕیارەكە خۆی توشی لێپێچینەوەی یاسایی دەكات.
ئاوێنە: عەتوان عەتوانی، ئەمڕۆ شەممە، بە پێگەی شەفەق نیوز-ی وتو، بڕیارەكەی دادگای فیدراڵی ئەوەی بەسەر وەزارەتی دارایی عێراقدا سەپاندوە كە هاوشێوەی فەرمانبەرانی پارێزگاكانی دیكەی عێراق، موچەی فەرمانبەرانی هەرێمی كوردستانیش بدات.
وتیشی، بڕیارە رونەو هەر لایەنێك ببێتە كۆسپ لەبەردەم جێبەجێكردنی هەر بڕگەیەكی بڕیارەكەدا، خۆی توشی لێپێچینەوەی یاسایی دەكات.
ئەوەشی خستۆتەڕو، بڕی ئەو پارەیەی بۆ موچەخۆرانی هەرێم دابین دەكرێت بەشێك دەبێت لە شایستە داراییەكانی هەرێم كە لەسەدا 12.67ی بودجەی عێراقەو ئەوەشی دەمێنێتەوە بۆ پڕۆژەكان و پێداویستی دامەزراوەكانی هەرێم دابین دەكرێت.
جەختیشی كردۆتەوە كە وەزارەتی دارایی عێراق مانگانە پارەی فەرمانبەران و خانەنشینانی هەرێمی كوردستان دەدات بەپێی بڕیارەكەی دادگا.
وتوشیەتی، پێویستە بەرپرسانی حكومەتی هەرێم كاردانەوەی ئەرێنییان بۆ بڕیارەكە هەبێت لەپێناو دابینكردنی موچەی فەرمانبەرانی هەرێم بەشێوەیەكی سروشتی.