ئەشواق جاف، ئەندامی کۆمیتەی ناوەندی پارتی رایگەیاند، حزبەكەی لە هەڵبژاردن "ناترسێت" بەڵام ئامادەنییە بچێتە نێو هەڵبژاردنێکەوە کە یاساکەی هی پەرلەمانی کوردستان نەبێت.

ئاوێنە: ئەشواق جاف، ئەندامی کۆمیتەی ناوەندی پارتی دیموکراتی کوردستان، ئەمڕۆ دوشەممە، بە دەنگی ئەمەریکای ڕاگەیاند،" بڕیارە یەک لە دوا یەکەکانی دادگای فیدراڵی زیانە بۆ سەر پرۆسەی سیاسی کوردستان، هەروەها لێدانە لە پێکەوەژیان لە کوردستان و لێدانە لە قەوارەی هەرێم، هەمو ئەمانەش مەبەست لێی بچوکكردنەوەی کوردستانە، چونکە لە ساڵی 2010ەوە دەستێک هەیە بۆ دژایەتی و نەهێشتنی قەوارەی هەرێم."

ئەشواق جاف وتیشی"دادگای فیدراڵی پێشێلی ماددەی 117ی کردوە، چونکە یاسایەک کە پەرلەمانی کوردستان دەریبکات و چەند خولێک کاری پێکردوە، ئێستا هاتوە دەڵێت یاسایەکی دەستوری نییە، بۆیە ڕونیدەکەینەوە هەڵبژاردن ئەرکی پەرلەمانی کوردستانە نەک دادگای فیدراڵی بێت بڕیاری لەسەر بدات، لەبەر ئەوەی یاساکە دژی هیچ بەندێکی دەستوری نییە، ئەمەی کراوە تەداخولە لە دەسەڵاتەکان."

ئەو ئەندامەی كۆمیتەی ناوەندی پارتی وتویەتی، پارتی هەمیشە جەختی لە ئەنجامدانی هەڵبژاردن کردوەتەوە لە کات و ساتی خۆیدا، بەڵام دادگا بێت و یاساکە بگۆڕێت کە دەزگایەکی هەرێم دایناوە، ئەمە چۆن کاری پێدەکرێت.

وتیشی،"بۆ هەمو لایەنەکان ڕونبێت پارتی ناچێتە نێو هەڵبژاردنێکەوە کە یاساکەی هی پەرلەمانی کوردستان نەبێت، ئێمە هەرێمین و بە پێی ماددەی 117 دروستکراوە، دەبێت هەرێم پابەندبێت بە یاسای پەرلەمانی کوردستان و ناکرێت دادگای فیدراڵی بێت و بڵێت نادەستورییە، پارتی لە هەڵبژاردن ناترسێت و نەترساوە، چونکە پارتی، تەنیا پارتی پارتییەکان نەبوەو نابێت بەڵکو پارتی هی هەمو خەڵکی کوردستانەو بە پرۆژەکانی خۆی سەلماندوە."