مامۆستایانی خوێندنی كوردی لە كەركوك دەڵێن، ئەگەر حكومەتی هەرێم لەم هەفتەیەدا دەست بە دابەشكردنی موچە نەكات ئەوا دەست دەكەن بە خۆپیشاندان و داواش دەكەن موچەكانیان لەڕێگەی بانكەكانی رافیدەین و رەشیدەوە بەئەلیكترۆنی بكرێت و هەژماری من رەتدەكەنەوە.
ئاوێنە: مامۆستایان و وانەبێژانی خوێندنی كوردی لە كەركوك، ئەمڕۆ دوشەممە، لە كۆنگرەیەكی رۆژنامەوانیدا رایانگەیاند، ئەگەر دەسەڵاتدارانی هەرێم، لەبەر پڕۆژەو بزنس و بەرژەوەندییەكانیان، حوكمڕانیان پێ ناكرێت و قوت و بژێوی خەڵكیان پێ دابین ناكرێت، ئەوا با لێگەڕێن و رێگری نەكەن كە "بەناو نەیارەكان و هاوشەریكەكان"یان لە بەغدا دابینی بكەن.
ئەوەشیانخستەڕو "چارەسەری كێشەی ئێمەی مامۆستایان و وانەبێژانی كەركوك زۆر ئاسانە بەرمەجێك ئێوە لەبری هەماهەنگی و هاوكاری تەنیا دەستهەڵگرن لە رێگری كردن."
مامۆستایان و وانەبێژانی خوێندنی كوردی لە كەركوك داواشیان كرد موچە بەپەلەو بێ دواكەوتن دابەشبكرێت و "ئەگەر لەم هەفتەیەدا موچە دابەش نەكرێ، هەفتەی داهاتو بڕیاری خۆپیشاندان دەدەن."
ئەوان داواشیان كرد كە موچەكانیان لەڕێگەی بانكەكانی رەشیدو رافیدەینەوە بە ئەلیكترۆنی بكرێت كە هەردو بانكەكە لە كەركوك لقیان هەیەو وتیشیان "ئێمە پێویستمان بە هەژماری من نییە."