دەربارەی چالاكییەكانیان بۆ 15 رۆژی سەرەتای مانگی رەمەزان قائیمقامیەتی سلێمانی راپۆرتێكی بڵاوكردەوە.
قائیمقامیەتی قەزای مەڵبەندی سلێمانی لە راپۆرتێكیدا بڵاویكردەوە:" لەئەنجامی سەردان و پشكنیینە بەردەوامەكانی لیژنە هاوبەشەكان بۆ دوكان و بازاڕ و شوێنە گشتییەكان لە مانگی رەمەزاندا، 13 تۆن 720 كیلۆگرام خواردن، خواردنەوە و كاڵا و شمەكی دیكەی خراپ و ماوەبەسەرچوو دەستییانبەسەردا گیراوە".
ئاماژەی بەوەشكردووە:" ئەو خۆراك و مادە بەسەرچووانە لە خواردەمەنی منداڵ (بسكیت، جەلی بۆن، كێك، شەربەت) و پاككەرەوەكانی (زاهی، سابون، كلێنس و كلێنسی تەڕ، هەویری ددان شۆردن و موكەیەف)پێكهاتبوون".
هەروەها، (دۆشاوی تەماتە، ماست، شەربەت، خورما، شیرینی، نەستەلە، ئاوی لەدەبە نراو، پەتاتە و خواردەمەنییە وشكەكان) لەگەڵ چەندین خۆراك و مادەی دیكەی خراپ و ماوەبەسەرچوو پێكهاتبوون.