ئامانج رەحیم، سكرتێری ئەنجومەنی وەزیرانی هەرێم رایگەیاند، وا بڕیارە ئیتر بابەتی موچە بە دور بگیرێت لە هەمو ناکۆکیی و کۆت و بەندەکان و وەک شایستەی دارایی موچەخۆر مامەڵەی لەگەڵ بکرێت.
ئاوێنە: ئامانج رەحیم، لە راگەیەندراوێكدا وتی، ئەمڕۆ پێنجشەممە، لە ئۆفیسی خۆم پێشوازیم کرد لە کونسوڵی گشتی بەریتانیا جەیمس گۆڵدمان و پێکەوە گفتوگۆمان کرد لەسەر دوا پەرەسەندنەکانی پەیوەندی نێوان هەرێم و بەغدا بە تایبەتی کۆبونەوەکانی دوێنێمان لە بەغدا لەگەڵ وەزارەتی دارایی فیدڕاڵ، و لێکتێگەیشتنی هاوبەش لەگەڵ بەغدا لە بارەی خەرجکردنی موچەی موچەخۆرانی هەرێم، و چارەسەرکردنی موچەی پێشمەرگەو هێزە ئەمنیەکان و تەواوکردنی ڕێکارەکانی ناردنی موچەی مانگی ئازار.
ئەو بەرپرسەی ئەنجومەنی وەزیرانی هەرێم جەختی كردۆتەوە کە "وا بڕیارە بە جۆرێک ئیتر بابەتی موچە بە دور بگیرێت لە هەمو ناکۆکیی و کۆت وبەندەکان، و وەک شایستەی دارایی موچەخۆر مامەڵە بکرێت."