مەسرور بارزانی، سەرۆكی حكومەتی هەرێمی كوردستان رایگەیاند، هێشتا مەترسی و هەڕەشە لە سەر خەڵکی کوردستان و ماف و دەستکەوتەکانی هەیەو پێویستە کۆمەڵگەی نێودەوڵەتیی، هەڵوێستی جیددی لە پاراستنی خەڵکی کوردستان هەبێت و دڵنیایی بدات کە خەڵکی کوردستان پارێزراو دەبێت و جارێکی دیکە ڕوبەڕوی شاڵاوەکانی جینۆسایدو پێشێلکردنی مافەکانی نابێتەوە.
ئاوێنە: مەسرور بارزانی، ئەمڕۆ هەینی، لە ساڵیادی دەرچونی بڕیاری 688ی ئەنجومەنی ئاسایشی سەر بە نەتەوە یەکگرتوەکان کە لە 1991/4/5 لە ئەنجامی هێرش و پەلاماری ڕژێمی پێشوی عێراق بۆ سەر کۆڕەوی ملیۆنی خەڵکی کوردستان بەرەو سنورەکان هاتە ئاراوە، پەیامێكی بڵاوكردەوە.
مەسرور بارزانی بڕیارەكەی بە "وەرچەرخانێکی مێژویی" لە خەبات و تێکۆشانی گەلی کوردستان ناوبردوەو سوپاسی هاوکاری و پشتیوانی کۆمەڵگەی نێودەوڵەتی و وڵاتانی ئەمەریکاو بەریتانیاو فەرەنسای كردوەو هەروەها سوپاسی هاوکاری و یارمەتییەکانی هەردو وڵاتی ئێران و تورکیاش كردوە کە "سنورەکانیان بەڕوی سەدان هەزار پەنابەری هەرێمی کوردستان کردەوە."
سەرۆكی حكومەتی هەرێم وتوشیەتی"لە ساڵیادی دەرچونی بڕیاری 688، دوپاتی دەکەینەوە کە هێشتا مەترسی و هەڕەشە لە سەر خەڵکی کوردستان و ماف و دەستکەوتەکانی هەیەو پێویستە کۆمەڵگەی نێودەوڵەتیی، هەڵوێستی جیددی لە پاراستنی خەڵکی کوردستان و داکۆکیکردن لە مافە ڕەواکانیدا هەبێت و دڵنیایی بدات کە خەڵکی کوردستان پارێزراو دەبێت و جارێکی دیکە ڕوبەڕوی شاڵاوەکانی جینۆسایدو پێشێلکردنی مافەکانی نابێتەوە."