^{بەڕێوەبەرایەتى گشتى حەج و عومرەى هەرێمى کوردستان رایگەیاند، خەڵکانێک بەناوى ڤیزەى ساڵى یان هەرجۆرە ڤیزەیەکى تر بانگەشەى بردنى حاجیان بۆ حەج دەکەن، رایدەگەیەنن، سعودیە لێپێچینەوەى تەواو لەوانە دەکات کە بەبێ ڤیزە دەچنە ئەو وڵاتە.}

^{بەڕێوەبەرایەتى گشتى حەج و عومرەى هەرێمى کوردستان رایگەیاند، لەگەڵ نزیکبوونەوەی وەرزی حەجی ئەمساڵ خەڵکانێک بەناوی کەسی و کۆمپانیاوە دەستیان کردووە بە بانگەشەی بردنی حاجیان بەرێگەی ڤیزەی ساڵی یاخود هەر جۆرە ڤیزەیەکی دیکە بۆیە لێرەوە بە گرنگ و پێویستی دەزانین هاوڵاتیانی هەرێمی کوردستان دووبارە ئاگاداربکەینەوە کە لە عێراق و لە هەرێمی کوردستان هیچ جۆرە حەجێکی لەم جۆرە نییە و حکومەتی سعوودیەش بۆ ئەمساڵ چەندین رێککاری توندی داناوە بۆ رێگریکردن لە حەجی نافەرمی.}

^{بەڕێوەبەرایەتى حەج و عومرە ئەوەشدەخاتەڕوو، وەزارەتی حەجی عەرەبستانی سعودیە بڵاویکردووتەوە و بە هەموو شاندی وڵاتانی راگەیاندووە کە هەر کەسێک جگە لە رێگەی فەرمی بە هەر رێگەیەکی دیکە لە وەرزی حەجدا فەریزەی حەج ئەنجام بدات لەکاتی دەستگیرکردنی تووشی کێشە دەبێتەوە چ بە پێبژاردنى پارە یاخود بە بەندکردن و رێگریکردن کە جارێکی دیکە ئەو هاوڵاتیە گەشتی سعوودیە نەکاتەوە .}

^{بەڕێوەبەرایەتى گشتى حەج و عومرە هێما بۆئەوەشدەکات، هەر هاوڵاتیەک بە رێگەی ڤیزەی ساڵی یاخود هەر جۆرە ڤیزەیەکی دیکە لە سعودیە دەستگیر بکرێت خۆی بەرپرسیار دەبێت و بەرێوەبەرایەتی گشتی حەج و عومڕە هەموو دەرهاویشتەکان دەخاتە ئەستۆی خۆیان وهەر کۆمپانیایەک لە ئەگەری ئەنجامدانى ئەمکارە ئەگەر لە بەرێوەبەرایەتی گشتی حەج وعومڕەی هەرێمی کوردستان مۆڵەتی هەبێت ئەوا مۆڵەتەکەی لێ وەردەگیرێتەوە و جارێکی دیکە بۆی نییە لە هەرێمی کوردستان و عیراق کاری حەج و عومرە بکاتەوە.}