رەجەب تەیب ئەردۆغان، سەرۆککۆماری تورکیا رایگەیاند، لەمیانی سەردانەكەیدا بۆ عێراق، لەدوای بەغدا سەردانی هەولێر دەكات و گفتوگۆ لەبارەی کێشەکانی هەرێم و بەغدا دەکات.
ئاوێنە: رەجەب تەیب ئەردۆغان، ئەمڕۆ لەدوای تەواوبونی نوێژی هەینی لە ئیستانبول لە لێدوانێكدا بۆ رۆژنامەنوسان لەبارەی سەردانە چاوەڕوانكراوەكەی بۆ عێراق وتی"سەردانێکی یەك رۆژە دەبێت، سەرەتا دەچینە بەغدا، دوای دیدارەکانمان لەگەڵ سەرۆک كۆمار و سەرۆکی حکومەت لە بەغدا سەردانی هەولێر دەکەین."
ئەردۆغان وتیشی"لە هەولێر دەرفەت دەبێت بۆ قسەكردن لەسەر کێشەکانی باکوری عێراق و هەروەها کێشەکانی پەیوەست بە حکومەتی ناوەندی. بابەتگەلێک هەن کە لەژێر چەتری گشتی پەیوەندییەکانی عێراق و تورکیادا باسیان دەکەین."