بەگوێرەی ئاژانسی تەسنیم، لە یاداشتنامە لێکتێگەیشتنە ١٤ خاڵیەکە ئێران مەرجی کردووە بۆ ئەمریکا کە بڕی ٢٤ ملیار دۆلار لە سەرمایە بلۆککراوەکانی وڵاتەکەی لەسەرەتای دانوستان ئازاد بکات.
ئاوێنە: ئەمڕۆ سێشەممە ئاژانسی هەواڵی "تەسنیم"، لەزاری سەرچاوەیەکی ئاگاداری نزیک لە تیمی دانوستانکار رایگەیاند "بەپێی دەقی یاداشتنامەیەکی لێکتێگەیشتنی ١٤ خاڵی لەنێوان ئێران و ئەمریکادا، دەبێت بڕی ٢٤ ملیار دۆلار لە سەرمایە بلۆکەکراوەکانی ئێران لەماوەی دانوستانەکاندا ئازاد بکرێت".
وەک ئەم میدیایە وتویەتی "ئێران جەخت دەکاتەوە کە دەبێت نیوەی ئەم بڕە پارەیە لەگەڵ دەستپێکردنی دانوستانەکاندا لەبەردەستدا بێت و، ئەوەی دیکەشی لەماوەی ٦٠ ڕۆژدا بگوازرێتەوە".
هەر بەگوێرەی تەسنیم، سەردانەکەی ئەمدواییەی عەباس عێراقچی و محەمەد باقر قالیباف بۆ قەتەر، بۆ ڕێککەوتن بووە لەسەر چۆنیەتی جێبەجێکردنی ئەم داواکارییە و چۆنیەتی بەدەستهێنانەوەی ١٢ ملیار دۆلار لە هەنگاوی یەکەمدا و لادانی ئاستەنگەکان.
هاوکات، ئەحمەد بەخشایش ئەردەستانی، ئەندامی کۆمیسیۆنی ئاسایشی نەتەوەیی پەرلەمان رایگەیاندووە، چەند ڕۆژێک لەمەوبەر بڕیار وابوو ١٢ ملیار دۆلار لە سەرمایە بلۆککراوەکانی ئێران لەڕێگەی ڕووسیاوە داخڵ بکرێت، بەڵام ئەمریکییەکان ڕێگرییان لەو گواستنەوەیە کرد.