وەزیری دەرەوەی ئەمریکا ڕایگەیاند، دانوستانەکان لەگەڵ ئێران سەبارەت بە درێژکردنەوەی ئاگربەست و کردنەوەی گەرووی هورمز چەند ڕۆژێکی دیکە دەخایەنێت.
ئاوێنە: مارکۆ ڕۆبیۆ، وەزیری دەرەوەی ئەمریکا پێش بەجێهێشتنی هیندستان بە ڕۆژنامەنوسانی وت "لە ئێستادا گفتوگۆیەکی زۆر دەربارەی دەقی بەڵگەنامە سەرەتاییەکە لە ئارادایە".
وەزیری دەرەوەی ئەمریکا هەروەها جەختی کردەوە کە دۆناڵد ترەمپ، سەرۆکی ئەمریکا، ڕێککەوتنێکی خراپ قبووڵ ناکات. ئەو وتیشی "گرنگترین خاڵ لەم ساتەدا کردنەوەی گەرووی هورمزە، بەبێ ئەوەی ڕێگە بە ئێران بدرێت بۆ تێپەڕبوونی کەشتییەکان باج وەربگرێت".
بەوتەی مارکۆ رۆبیۆ "گەرووی هورمز دەبێت بەبێ ئاستەنگ و بەبێ باج بە کراوەیی بمێنێتەوە".
ئەم لێدوانانە لە کاتێکدا دەدرێن کە ئەمریکا سەرەڕای ڕاگەیاندنی ئاگربەست، هێرشی نوێی بۆسەر باشوری ئێران ئەنجام داوە و سوپای پاسدارانی ئێرانیش ئاماژە بەوەدەکات کە مافی "ڕەوا و بێ ئەملاو ئەولای" خۆی بۆ وەڵامدانەوەی هەرجۆرە پێشێلکارییەکی ئاگربەست لەلایەن ئەمریکاوە دەپارێزێت.