دۆناڵد ترەمپ، سەرۆکی ئەمریکا، دوێنێ چوارشەممە، هەڕەشەیەکی توندی ئاراستەی سوڵتانیشینی عومان کرد، ئەگەر بێت و لە پرسی دووبارەکردنەوەی گەرووی هورمزدا لە پاڵ ئێران بوەستێت، ئەمەش دوای بڵاوبوونەوەی چەند دەنگۆیەک سەبارەت بەوەی کە تاران بە هاوکاری لەگەڵ مەسقەت بەڕێوەبردنی گەرووەکە دەگرێتە ئەستۆ.
ئاوێنە: ترەمپ وتی کە پێویستە عومان "ڕەفتاری باش بێت" ئەگەرنا بە گوتەی خۆی "پێویست دەکات خاپووریان بکەین". ئەمەش لە وەڵامی پرسیارێکدا هات سەبارەت بەوەی ئایا ڕازی دەبێت بە ڕێککەوتنێکی کورتخایەن کە ڕێگە بە تاران و مەسقەت بدات گەرووی هورمز بەڕێوەببەن.
ترەمپ لە میانی قسەکانیدا بۆ ڕۆژنامەنووسان لە کۆبوونەوەیەکی ئیدارەکەیدا لە کۆشکی سپی ڕایگەیاند: "نەخێر، گەرووەکە بۆ هەمووان کراوە دەبێت". هەروەها گوتیشی: "ئەوە ئاوێکی نێودەوڵەتییە، و عومانیش وەک هەمووان ڕەفتاری باش دەبێت ئەگەرنا پێویست دەکات خاپووریان بکەین. ئەوان لەوە تێدەگەن و باریان باش دەبێت".
کۆشکی سپی دەستبەجێ وەڵامی پرسیاری ڕۆژنامەنووسانی نەدایەوە سەبارەت بەوەی کە ئایا ئەو دەستەواژەیە هەڵەی زمانی ترەمپ بووە، یان ئایا مەبەستی ئاماژەدان بووە بە ئێران لەبری عومان.
دواتر وەزارەتی دەرەوەی ئەمریکا گرتەیەکی ڤیدیۆیی و دەقی لێدوانەکانی ترەمپی سەبارەت بە عومان بڵاوکردەوە، بەبێ هیچ ڕاستکردنەوە یان ڕوونکردنەوەیەک.
لێدوانەکانی ترەمپ شەپۆلێکی توڕەیی لە شەقامی عەرەبیدا لێکەوتەوە، و نووسەران و سیاسەتمەداران بە "گوتاری ملهوڕی" وەسفیان کرد.
ئەمەش دوای ئەوە هات کە تەلەفزیۆنی فەرمی ئێران وردەکاریی ڕەشنووسی چوارچێوەی کارکردنی سەرەتایی نافەرمی بۆ یاداشتێکی لێکتێگەیشتن لەگەڵ ویلایەتە یەکگرتووەکانی ئەمریکا بە نێوەندگیریی پاکستان بە مەبەستی کۆتاییهێنان بە جەنگ ڕاگەیاند.
لە ڕەشنووسەکەدا هاتووە کە تاران بە هاوکاری لەگەڵ سوڵتانیشینی عومان بەڕێوەبردنی ڕێڕەوی جووڵەی کەشتییەکان بەناو گەرووی هورمزدا دەگرێتە ئەستۆ.
تەلەفزیۆنی فەرمی ئێران ئاماژەی بەوەشکرد کە -بەگوێرەی ڕەشنووسەکە- تاران بەڵێن دەدات لە ماوەی یەک مانگدا تێپەڕبوونی کەشتییە بازرگانییەکان بە گەرووی هورمزدا بگەڕێنێتەوە بۆ ئاستی پێش جەنگ.
تەلەفزیۆنی ئێران گوتی: "چوارچێوەی سەرەتایی لێکتێگەیشتنی ئیسلام ئاباد کە دەتوانێت ببێتە خاڵێکی وەرچەرخان لە ڕێڕەوی کۆتاییهێنان بەو جەنگەی بەسەر ئێراندا سەپێنراوە، لەم ڕۆژانەدا پێداچوونەوەی بۆ دەکرێت و دواین دەستکاری دەقەکەی دەکرێت"، ئاماژەی بەوەشکرد کە "هێشتا کۆتایی نەهاتووە".
لە بەرامبەریشدا، کۆشکی سپی ڕایگەیاند کە ڕاپۆرتەکەی تەلەفزیۆنی ئێران "ڕاست نییە"، و ئەو یاداشتەی ئاماژەی پێکراوە "بە تەواوی هەڵبەستراوە".