سەرۆکی ویلایەتە یەکگرتووەکانی ئەمریكا، دۆناڵد ترەمپ، جەخت لەوە دەکاتەوە کە هیچ نیگەرانییەکی بەرامبەر بە لێکەوتە سیاسییەکانی کێشە و ململانێیەکی درێژخایەن لەگەڵ کۆماری ئیسلامی ئێران نییە. هاوکات ڕەتیشیدەکاتەوە کە هەڵبژاردنەکانی ئەمساڵی وڵاتەکەی ببنە هۆی ئەوەی ناچار بێت مل بۆ ڕێککەوتنێک لەگەڵ تاران بدات.
ئاوێنە: لە میانی کۆبوونەوەیەکی لەگەڵ کابینەی ئیدارەکەی لە ناو کۆشکی سپی، ترەمپ ڕایگەیاند کە سەرکردەکانی ئێران تووشی هەڵەیەکی گەورە دەبن ئەگەر پێیان وابێت هەڵبژاردنەکانی ناوەڕاستی خول، کە بڕیارە لە مانگی تشرینی دووەمی ئەمساڵ بەڕێوەبچێت، فشاری بۆ دەهێنێت تاوەکو پەلە بکات لە ئەنجامدانی ڕێککەوتنێک لەگەڵیاندا.
لە بەشێکی دیکەی قسەکانیدا، سەرۆکی ئەمریكا بە توندی ئاماژەی بە لێکدانەوەکانی سەرکردایەتی ئێران کرد و وتی: "ئەوان وایان بۆ دەچوو کە دەتوانن پشوودرێژتر بن لە من، دەیانگوت ئێمە دانبەخۆداگرتووتر دەبین چونکە ئەو هەڵبژاردنی ناوەڕاستی خولی لەپێشە، بەڵام پێیان دەڵێم کە من هیچ گرنگییەک بە هەڵبژاردنی ناوەڕاستی خول نادەم."
جێی باسە، بڕیارە لە مانگی تشرینی دووەمی ئەمساڵدا، پرۆسەی هەڵبژاردنی ناوەڕاستی خول لە ویلایەتە یەکگرتووەکانی ئەمریكا بەڕێوەبچێت. لەم چوارچێوەیەشدا، شرۆڤەکارانی سیاسی پێشبینی ئەوە دەکەن کە پارتی کۆمارییەکان ڕووبەڕووی ئاستەنگ ببنەوە و ئەگەری هەیە کۆنتڕۆڵی ئەنجومەنی نوێنەران لە قازانجی پارتی دیموکراتەکان لەدەست بدەن.