ڕاگەیاندنی ئاگربەست لە لوبنان لەلایەن دۆناڵد ترەمپ، سەرۆکی ئەمریکاوە، شەپۆلێک لە ڕەخنەی توندی بەرپرسان و ئۆپۆزیسیۆنی ئیسرائیلی بەرامبەر بە بێنیامین نەتانیاهۆ، سەرۆک وەزیران لێکەوتەوە، ئەمەش لە پاش هەڕەشەکانی بۆ ئەنجامدانی هێرش بۆ سەر باشووری بەیرووت.
ئاوێنە: بە خێرایی کاردانەوەی تووڕە بەرامبەر بە نەتانیاهۆ سەریهەڵدا، دوای ئەوەی داواکارییەکەی سەرۆکی ئەمریکای پەسەندکرد بۆ ڕاگرتنی هێرشکردنە سەر بەیرووت و ڕاگەیاندنی ئاگربەست لەگەڵ حزبوڵڵا لە لوبنان.
یائیر لاپید، سەرۆکی ئۆپۆزیسیۆنی ئیسرائیل، لە پۆستێکدا لە پلاتفۆرمی ئێکس ڕایگەیاند، کە ئەمە "دەوڵەتێکە بە تەواوی خراوەتە ژێر وەسیەت و سەرپەرشتییەوە"، وەک ئاماژەیەک بۆ ملکەچبوونی نەتانیاهۆ بۆ ڕێنماییەکانی ترەمپ.
لە لای خۆیەوە، ئەڤیگدۆر لیبەرمان، سەرۆکی حزبی "ئیسرائیل ماڵمانە"، هێرشی کردە سەر نەتانیاهۆ و بە "بووکەڵە" نەک "سەرۆک وەزیران" وەسفی کرد، بەپێی ئەوەی ڕۆژنامەی "ئیسرائیل هیوم" بڵاویکردووەتەوە.