دەستەی فڕۆکەوانیی مەدەنی لە کوەیت ڕایگەیاند کە تێرمیناڵی سەرنشینان لە فڕۆکەخانەی نێودەوڵەتیی کوەیت ڕووبەڕووی هێرشێک بووەتەوە بە فڕۆکەی بێفڕۆکەوان و مووشەکی ئێرانی، کە بووەتە هۆی برینداربوون و کەوتنەوەی زیانی زۆر لە ژمارەیەک لە دامەزراوەکانی فڕۆکەخانەکەدا، هەروەها جەختی لەوە کردەوە کە دەستبەجێ پلانی فریاگوزاری کارا کراوە.
ئاوێنە: دەستەکە لە ڕاگەیەندراوێکدا، ئەمڕۆ چوارشەممە، ڕوونی کردەوە کە دەسەڵاتداران بڕیاریانداوە سەرجەم گەشتە ئاسمانییەکانی فڕۆکەخانەی نێودەوڵەتیی کوەیت ڕابگرن و ژمارەیەک لە گەشتەکانیش ئاراستەی فڕۆکەخانە جێگرەوەکان بکەن تا کاتێکی نادیار، ئەمەش وەکو هەنگاوێکی خۆپارێزی بۆ دڵنیابوون لە سەلامەتی گەشتیاران و کارمەندان.
لە لای خۆیەوە، سوپای کوەیت ڕایگەیاند کە بە هەماهەنگی لەگەڵ لایەنە پەیوەندیدارەکان چاودێری دۆخەکە دەکەن و ڕێوشوێنی پێویست دەگرنەبەر بۆ پاراستنی ئاسایشی وڵات.
پێشتریش، فەرماندەیی ناوەندیی ئەمریکا (سێنتکۆم) بەرەبەیانی چوارشەممە ڕایگەیاند کە سەرکەوتوو بووە لە بەرپەرچدانەوەی شەپۆلێکی هێرشی جۆراوجۆری ئێرانی کە وڵاتانی ناوچەکەی کردبووە ئامانج، و جەختی لەوە کردەوە کە مووشەکە بالیستییەکان و فڕۆکە بێفڕۆکەوانەکانی ئێران نەیانتوانیوە ئامانجەکانیان بپێکن.
فەرماندەیی ئەمریکا ئاماژەی بەوە کرد کە گورزی وردیان وەشاندووەتە وێستگەیەکی کۆنترۆڵکردنی زەمینی سەربازیی ئێران لە دوورگەی قشم، ئەوەش وەک وەڵامێک بۆ ئەو هێرشانەی دەخرێنە پاڵ تاران.
لە وردەکارییەکاندا، "سێنتکۆم" ئاماژەی بەوە کرد کە دوو مووشەکی ئێرانی کە ئاراستەی کوەیت کرابوون، پێش گەیشتن بە ئامانجەکانیان کەوتوونەتە خوارەوە یان تێکشکاون، لە کاتێکدا سیستەمەکانی بەرگریی ئاسمانیی ئەمریکا و بەحرەین دەستبەجێ توانیویانە سێ مووشەک تێکبشکێنن کە بەرەو بەحرەین هەڵدرابوون.
هەروەها ڕایگەیاند کە سێ فڕۆکەی بێفڕۆکەوانی خۆکوژییان خستووەتە خوارەوە کە دەریاوانە مەدەنییەکانیان کردبووە ئامانج لە کاتی تێپەڕبوونیان بە شێوەیەکی یاسایی بەناو ئاوە هەرێمییەکاندا، و جەختی لەوە کردەوە کە هیچ زیانێکی گیانی لە ڕیزەکانی هێزەکانی ئەمریکادا بەهۆی ئەم هێرشانەوە تۆمار نەکراوە.
لە ڕاگەیەندراوێکی دواتردا، فەرماندەیی ئەمریکا پشتڕاستی کردەوە کە شەپۆلێکی تری فڕۆکە بێفڕۆکەوانەکانی ئێران هەوڵیان داوە هێزەکانیان لە کوەیت بکەنە ئامانج، بەڵام ئەوانیش شکستیان هێناوە لە پێكانی ئامانجەکانیان، و ئاماژەی بەوە کرد کە بەرگرییە ئاسمانییەکانی ئەمریکا سەرکەوتوو بوون لە خستنەخوارەوەی ژمارەیەکیان بەبێ هیچ زیانێکی گیانی و ماددی.
لە بەرامبەردا، سوپای پاسدارانی ئێران ڕایگەیاند کە بە مووشەک و فڕۆکەی بێفڕۆکەوان "بنکەیەکی ئەمریکی لە ناوچەکە" و هەروەها کەشتیگەلی پێنجەمی ئەمریکای لە بەحرەین کردووەتە ئامانج، ئەمەش وەکو وەڵامێک بۆ "دەستدرێژی" ویلایەتە یەکگرتووەکان بۆ سەر تاوەرێکی پەیوەندیکردن لە دوورگەی قشم، کە ئەمەش لەلایەن فەرماندەیی "سێنتکۆم"ەوە بە درۆ خرایەوە.
سوپای پاسداران لە ڕاگەیەندراوێکدا وتی "پێشتر هۆشداریمان دابوو کە وەڵاممان جیاواز دەبێت ئەگەر ڕووبەڕووی دەستدرێژی ببینەوە، و دەبێت وەڵامەکەمان ببێتە وانەیەک بۆ دوژمن"، و ئاماژەی بەوە کرد کە سوپای ئەمریکا ڕۆژی سێشەممەی ڕابردوو نەوتکێشێکی ئێرانی لە نزیک گەرووی هورمز کردووەتە ئامانج، کە بووەتە هۆی زیانگەیاندن بە ژووری مەکینەکانی.
لە بەرامبەردا، سوپای پاسداران ڕایگەیاند کە کەشتیی "پانایا"ی سەر بە "دوژمنی زایۆنی-ئەمریکی" کردووەتە ئامانج، وەکو وەڵامێک بۆ بە ئامانجگرتنی نەوتکێشە ئێرانییەکە و "پێشێلکردنی یاساکانی تێپەڕبوون لە هورمز"، بەپێی ڕاگەیەندراوەکە.
ڕاگەیەندراوەکە هەڕەشەی لە هێزەکانی ئەمریکا کرد، و هۆشداری دا لەوەی کە "تێکدانی ئاسایشی گەرووەکە باجێکی قورس لەسەر سوپای دەستدرێژکاری ئەمریکا دەکەوێت".
لەم چوارچێوەیەدا، ئەمڕۆ چوارشەممە سوپای کوەیت ڕایگەیاند کە بەرگرییە ئاسمانییەکانی ڕووبەڕووی "هێرشی دوژمنکارانە"ی مووشەکی و فڕۆکەی بێفڕۆکەوان بوونەتەوە، بەبێ ئەوەی سەرچاوەکەی دیاری بکات. لە کاتێکدا وەزارەتی ناوخۆی بەحرەین ڕایگەیاند کە زەنگی ئاگادارکردنەوە لێدراوە، و داوای لە هاووڵاتیان و نیشتەجێبووان کرد "ئارامی بپارێزن و بچنە نزیکترین شوێنی پارێزراو".