لە کاتێکدا کە ئەم دواییانە چەندین جار جەختی لەوە کردووەتەوە کە پێشوازی لە چارەسەری دیپلۆماسی دەکات بەبێ ئەوەی بژاردەی سەربازی دژی ئێران بە دوور بزانێت، بەرپرسانی ئاگاداری ئەمریکی ڕایانگەیاند کە دۆناڵد ترەمپ، سەرۆکی ئەمریکا بە نهێنی بە یاریدەدەرەکانی ڕاگەیاندووە کە ئەگەر تاران سەربازانی ئەمریکی بکوژێت، ئەوا بیر لە کۆتاییهێنان بە ئاگربەست دەکاتەوە.
ئاوێنە: هەروەها ئەو بەرپرسانە ڕوونیان کردەوە کە وەستانی هێرشە ئاسمانییەکان کە چەند هەفتەیەکە بەردەوامە هێشتا وەک خۆیەتی، سەرەڕای ئەو زنجیرە پێکدادانە دوولایەنانەی کە لەم دواییانەدا ڕوویانداوە، ئەمەش بەپێی ئەوەی ڕۆژنامەی "وۆڵ ستریت جۆرناڵ" گواستوویەتیەوە.
لە لایەکی دیکەوە، مارکۆ ڕوبیۆ، وەزیری دەرەوەی ئەمریکا، هێرشە دوولایەنەکانی بەوە وەسف کرد کە تەنیا سروشتێکی بەرگرییان هەیە و گەڕانەوە نین بۆ شەڕێکی گشتگیر. لە میانەی دانیشتنێکی گوێگرتن لە ئەنجومەنی نوێنەرانیشدا لە ڕۆژی چوارشەممەی ڕابردوودا گوتی: "ئەم هێرشانە وەک وەڵامێک بۆ جووڵەکانی ئێران ڕوودەدەن. ئەگەر ئەوان تەقە لەو کەشتییانە نەکەن، ئێمەش تەقە ناکەین، بەڵام دەبێت وەڵاممان هەبێت."
بەڵام بەرپرسانی ئەمریکی ئاماژەیان بەوە کردووە کە دووبارەبوونەوەی ئەم هێرشانە فشاری سەر ترەمپی زیاد کردووە و گومانی لەسەر بەردەوامیی ئاگربەستەکە بۆ ماوەیەکی درێژخایەن دروست کردووە.
لە هەمان کاتدا ترەمپ چەندین جار جەختی لەوە کردووەتەوە کە لە لێواری واژۆکردنی ڕێککەوتنێکدایە بۆ کۆتاییهێنان بە شەڕ، کە دەبێتە هۆی دووبارە کردنەوەی گەرووەکە، هەڵوەشاندنەوەی بەرنامە ئەتۆمییەکەی ئێران و لەناوبردنی یۆرانیۆمی پیتێنراوی ئەو وڵاتە.
پێشتریش سەرۆکی ئەمریکا و یاریدەدەرەکانی بەڵێنیان دابوو کە ماوەی ململانێکان لە شەش هەفتە تێپەڕ نەکات لە دوای هەڵگیرسانی لە ٢٨ی شوباتدا، و جەختیان لەوە کردەوە کە ئامانجەکە لەناوبردنی هەڕەشە ئەتۆمی و مووشەکییەکانی ئێرانە.
هەروەها بەرپرسێکی کۆشکی سپی دوێنێ دووبارە ئاماژەی بەوە کرد کە ترەمپ پێی باشە بەرنامە ئەتۆمییەکەی ئێران لە ڕێگەی دیپلۆماسییەوە کۆتایی پێبهێنێت، بەڵام لە بارەی هێڵە سوورەکانییەوە زۆر ڕوون بووە.
لە بەرامبەردا، عەباس عێراقچی، وەزیری دەرەوەی ئێران ئاماژەی بەوە کرد کە هێرشەکانی ئیسرائیل بۆ سەر بەیرووت دەبێتە هۆی گەڕانەوە بۆ شەڕێکی گشتگیر، و چارەنووسی ململانێکانی لوبنانی بە داهاتووی ئاگربەستی نێوان ئەمریکا و ئێرانەوە گرێدا.
ئەم هەڵوێستانە لە کاتێکدا دێن کە ئیدارەی ئەمریکا چەند هەفتەیەکە کار لەسەر ئامادەکردنی "یاداشتنامەیەکی لێکتێگەیشتن"ی سەرەتایی دەکات لە دوای گفتوگۆکانی لەگەڵ لایەنی ئێرانی لە ڕێگەی ناوبژیوانی پاکستانییەوە، بە مەبەستی دیاریکردنی چوارچێوەی دانوستانەکان بۆ ماوەی نزیکەی ٦٠ ڕۆژ. هەروەها سەرۆکی ئەمریکا پێشنیازە نوێیەکەی ئێرانی لە ڕۆژی هەینی ڕابردوودا ڕەتکردەوە و بە یاریدەدەرەکانی گوتووە کە دەبێت تاران لە سەرەتاوە سازشی ڕاستەقینە بکات، نەک لە ماوەیەکی کاتی درێژخایەندا، و جەختیشی لەوە کردەوە کە نابێت پێش ئەوە هیچ ئیمتیازاتێک بەدەست بهێنێت.
لە لایەکی دیکەوە، تاران جەختی لەوە کردەوە کە دانوستان لەسەر بەرنامە ئەتۆمییەکەی ناکات، تەنیا لە دوای ئەوەی ئەمریکا دەست بەسەرداگرتنی سەرمایە بلۆککراوەکانی لە دەرەوە هەڵبوەشێنێتەوە یان دەستکەوتی دارایی دیکەی پێشکەش بکات.
هەروەها داوای کۆتاییهێنان بە شەڕی نێوان ئیسرائیل و حزبوڵڵای هاوپەیمانی کرد، ئەمەش وای لە ترەمپ کرد کە ڕۆژی دووشەممەی ڕابردوو بە تووڕەیییەوە داوا لە بێنیامین ناتانیاهۆ، سەرۆک وەزیرانی ئیسرائیل بکات کە هێرشە پلان بۆ داڕێژراوەکانی سەر گەڕەکی باشووری بەیرووت (زاحیە) هەڵبوەشێنێتەوە.