ڕۆژی هەینی، ماڵپەڕی "ئەکسیۆس"ی ئەمریکی بڵاویکردەوە کە دانوستانەکان لەگەڵ ئێران گەیشتوونەتە قۆناغەکانی کۆتایی، و ئاماژەی بەوەشکردووە کە دانوستانکارانی ئەمریکی، ستیڤ ویتکۆف و جارد کوشنەر، لەگەڵ شارەزایانی ئەتۆمی ئەمریکی کۆبوونەتەوە.
ئاوێنە: ماڵپەڕی ئەکسیۆس لە زاری بەرپرسانی ئەمریکییەوە گواستییەوە کە "کوشنەر و ویتکۆف دوێنێ لەگەڵ شارەزایانی ئەتۆمی لە تاقیگەی نیشتمانی لە ویلایەتی تێنسی کۆبوونەتەوە".
بەرپرسەکان جەختیان لەوە کردەوە کە "هێشتا ناکۆکی لە نێوان واشنتۆن و تاران هەیە سەبارەت بە ژمارەیەک لە وردەکارییەکانی یاداشتی لێکتێگەیشتنەکە"، و ئاماژەیان بەوەشدا کە "دانوستانەکان لە قۆناغی کۆتاییدان، و ڕوون نییە ئایا دەگەینە ڕێککەوتن یاخود نا".
هەروەها بەرپرسەکان ئەوەشیان وت کە "کۆبوونەوەی ویتکۆف و کوشنەر لەگەڵ شارەزایانی ئەتۆمی بەو واتایە نایەت کە ڕێککەوتن ڕوودەدات"، بەڵام ڕوونیانکردەوە کە "کۆبوونەوەکە ئاماژەیە بۆ ئەوەی دانوستانەکان لە قۆناغێکی جدییدان".
دانوستانەکانی نێوان واشنتۆن و تاران بەردەوامن لە کاتێکدا ناکۆکی هەیە لەسەر پارە سڕکراوەکانی ئێران لە دەرەوەی وڵات.
ڕاپۆرتە میدیاییەکانی ئەمریکا باسیان لەوە کردووە کە ئێران داوای قەرەبوویەکی دارایی دەستبەجێ بە بڕی ١٢ ملیار دۆلار دەکات لە کاتی واژۆکردنی هەر ڕێککەوتنێکی سەرەتاییدا، لە کاتێکدا واشنتۆن پێی باشترە ئازادکردنی پارەکان ببەسترێتەوە بە ئاستی پابەندبوونی تاران بە بڕگەکانی ڕێککەوتنەکەوە.
سەرمایە سڕکراوەکانی ئێران لە دەرەوەی وڵات بە نزیکەی ١٠٠ ملیار دۆلار دەخەمڵێندرێن، لە کاتێکدا ئیدارەی ئەمریکا بە یەکێک لە گرنگترین کارتەکانی فشار دەزانێت کە لە دانوستانەکانی ئێستای تایبەت بە بەرنامە ئەتۆمییەکەی ئێراندا بەکاری دەهێنێت.