سوپای ئیسرائیل ڕایگەیاند کە چەندین موشەک لە ئێرانەوە ئاراستەی ناوچەکانی ناوەڕاست و باشووری ئیسرائیل (بیابانی نەگڤ، بیئر سەبع، دیمۆنا، دەریای مردوو، و ئەشدۆد) کراون.
ئاوێنە: لەبارەی زیانەکانەوە سوپای ئیسرائیل دەڵێت: زۆرینەی موشەکەکان لەلایەن سیستەمی بەرگرییەوە تێکشکێندراون (لە نێویاندا شەپۆلێکی ٧ موشەکی و یەکێکی تری ١٠ موشەکی). پاشماوەی موشەکەکان لە بێت شیمش، بیئر سەبع، و نزیک کۆمەڵگەی جولەکەنشینی ئیتامار لە کەناری ڕۆژئاوا کەوتوونەتە خوارەوە و زیانیان بە ٣ ماڵ گەیاندووە.
بەرپرسانی سەربازی ئیسرائیل جەخت دەکەنەوە کە وەڵامی هەر هێرشێکی موشەکیی ئێران و بریکارەکانی دەدەنەوە و فڕۆکە جەنگییەکان و هێزی دەریایی ئیسرائیل لە دەرەوەی ئاسمانی ئێرانەوە، زیاتر لە ١٠ پێگەی سەربازییان لە ڕۆژئاوا و ناوەڕاستی ئێران (تاران، تەورێز، و ئەسفەهان) کردە ئامانج.
هێرشەکان فڕۆکەخانەی مێهرئاباد، کۆگاکانی درۆنی هێرشبەر، و سیستەمەکانی بەرگری ئاسمانی و موشەکی بالیستییان گرتووەتەوە. ئێران دەڵێت ناوچە نیشتەجێبوونەکان نەکراونەتە ئامانج.
بەپێی سەرچاوە ئەمریکییەکان، هێرشەکەی ئیسرائیل بۆ سەر ئێران بەشێوەیەکی ڕێژەیی "سنووردار" بووە، ئەمەش دوای ئەوەی دۆناڵد ترەمپ داوای لە نەتانیاهۆ کردبوو وەڵامی ئێران نەداتەوە.
سوپای ئەمریکا ڕەتیکردەوە بەشداری لە هێرشەکانی ئیسرائیلدا کردبێت، هەرچەندە ئیسرائیل پێشوەختە هەماهەنگی لەگەڵ واشنتن کردووە.
ئێران هۆشداری داوە کە هەر سەرکێشییەک بەرامبەر ئێران یان لوبنان بێت، ڕووبەڕووی وەڵامێکی "وێرانکەر و گشتگیر" دەبێتەوە.
وەزارەتی دەرەوەی ئێران هێرشەکانی وەک بەشێک لە مافی بەرگری ڕەوا (بەپێی مادەی ٥١ی نەتەوە یەکگرتووەکان) ناوبرد و ئەمریکای بە بەرپرسیار زانی لەهەر هەڵکشانێکی گرژییەکان.
پاش هێرشەکەی ئیسرائیل بۆ سەر ئێران، موشەکێک لە یەمەنەوە ئاراستەی ئیسرائیل کرا و تێکشکێندرا، کە بووە هۆی داخستنی کاتیی فڕۆکەخانەی بن گۆریۆن.
دۆخی لەناکاوی ئیسرائیل: ئیسرائیل باری لەناکاوی ڕاگەیاندووە، خوێندنگەکان داخراون، نەخۆشخانەکان خراونەتە سیستەمی فریاگوزارییەوە، و داوا لە هاووڵاتیان کراوە لە پەناگەکان بمێننەوە.