لەگەڵ بەردەوامیی گرژییەکان، سەرچاوە ئیسرائیلییەکان باس لە کوژرانی کەسی یەکەم و دەسەڵاتداری سەرەکیی ئێستای سوپای پاسداران دەکەن لە هێرشەکانی سەر تاران. پشتڕاستکردنەوەی ئەم هەواڵە دەبێتە گەورەترین گورزی سەربازی لە سەرەتای جەنگەکەوە.
ئاوێنە: دوای تێپەڕبوونی تەنها چەند کاتژمێرێک بەسەر هەڕەشە توندەکانی تاران، میدیاکانی ئیسرائیل هەواڵی کوژرانی عەمید ئەحمەد وەحیدی، فەرماندەی گشتیی سوپای پاسدارانی ئێرانیان لە میانەی هێرشە ئاسمانییەکانی ئەمڕۆی سەر شاری تاران بڵاوکردەوە. سەرباری گرنگی و هەستیاریی بابەتەکە، تا ئێستا لایەنە فەرمییەکانی کۆماری ئیسلامیی ئێران هیچ ڕاگەیەندراوێکیان بۆ ڕەتکردنەوە یان پشتڕاستکردنەوەی مەرگی ئەم فەرماندە باڵایە بڵاونەکردووەتەوە.
چاودێرانی سیاسی و سەربازی پێیان وایە، ئەگەر ئەم پەرەسەندنە بە فەرمی پشتڕاست بکرێتەوە، ئەوا بە گەورەترین گورز دادەنرێت کە بەر بنکەی بڕیاردانی سەربازیی ئێران کەوتبێت لە سەرەتای دەستپێکردنی جەنگەکەوە.
ئەحمەد وەحیدی لە پاش کوژرانی محەمەد پاکپور لە سەرەتای مانگی ئازاری ئەمساڵەوە، پۆستی فەرماندەیی گشتیی سوپای پاسدارانی وەرگرتووە. لەو کاتەوە ناوبراو بە "پیاوی یەکەم و بەهێزترین سەرکردەی ئێران" وەسف دەکرێت.
بەپێی شیکاریی چاودێران، بەهۆی ئەوەی موجتەبا خامنەیی، مورشیدی نوێی ئێران، لە ئێستادا بەهۆی بریندارییەوە ناچالاکە، ڕۆڵی یەکەم و کۆتایی سەبارەت بە دەسەڵاتی سیاسی و سەربازیی ئێران کەوتبووە دەست ئەحمەد وەحیدی.
گرنگترین وێستگە و زانیارییەکان لەسەر ئەحمەد وەحیدی:
بڕیاردەری یەکەم لە وڵاتدا: بەهۆی نادیاریی دۆخی تەندروستیی موجتەبا خامنەییەوە، وەحیدی لە پاڵ کۆمەڵێک لە فەرماندە باڵاکانی سوپای پاسداران، سەرکردایەتیی ڕاستەقینەی جەنگ و بڕیارە ستراتیژییەکانی ئێرانیان لە ئەستۆ بووە.
دامەزرێنەری فەیلەقی قودس: وەحیدی وەک یەکەم فەرماندە و دامەزرێنەری فەیلەقی قودسی سەر بە سوپای پاسداران دەناسرێت، کە لە نێوان ساڵانی ١٩٨٨ بۆ ١٩٩٧ و پێش قاسم سولەیمانی ئەو پۆستەی بەڕێوەبردووە.
هەڵوێستی توندڕەوانە: ناوبراو لەسەر ئاستی ناوخۆ و دەرەوە بە یەکێک لە نەیارە سەرسەختەکانی هەرجۆرە دانوستانێک لەگەڵ ئەمریکا و ئیسرائیل دادەنرا، و بەردەوام پێداگریی لەسەر درێژەدان بە جەنگ دەکرد.