سەرەڕای هێرشە بەرامبەرەکانی نێوان ئێران و ئەمریکا، بەرپرسێکی ئەمریکی جەختی لەوە کردەوە کە «هیچ شتێک نەگۆڕاوە و ڕێککەوتن لەگەڵ لایەنی ئێرانی هێشتا نزیکە».
ئاوێنە: بەپێی ڕاپۆرتێکی ڕۆژنامەی «پۆلیتیكۆ»، ئەو بەرپرسە ئەمریکییە ڕۆژی چوارشەممە ڕایگەیاند دۆناڵد ترەمپ، سەرۆکی ئەمریکا هێشتا پێی وایە سەرەڕای هێرشە تۆڵەسەندنەوەکان، گەیشتن بە ڕێککەوتن لەگەڵ ئێران نزیکە.
گەشبینیی جەی دی ڤانس
جەی دی ڤانس، جێگری سەرۆکی ئەمریکا، شەوی ڕابردوو گەشبینیی خۆی سەبارەت بە ڕێککەوتنی نێوان ئەمریکا و ئێران لە ئایندەیەکی نزیکدا دەربڕی.
ئەو جەختی لەوە کردەوە کە دانوستانەکانی ئێستا پێشکەوتنی بەرچاویان بەخۆوە بینیوە و ئەگەری سەرکەوتنیان بەرز بووەتەوە.
ڤانس لە گفتوگۆیەکدا لەگەڵ «سی بی سی نیوز» ڕایگەیاند کە واشنتن ئێستا لە پێگەیەکدایە کە دەتوانێت «ڕێککەوتنێکی باش» لەگەڵ تاران بەدەست بهێنێت.
ڤانس وتیشی کە بە بڕوای ئەو، هەردوو لا «زۆر نزیک بوونەتەوە بۆ گەیشتن بە لێکتێگەیشتنێکی کۆتایی».
هەروەها ئاماژەی بەوەش کرد کە ئەگەر ڕەوتی گفتوگۆکان بەم خێراییە بەردەوام بن، لەوانەیە لە هەفتەی داهاتوودا ڕێککەوتن بەدەست بێت.
ڤانس جەختی لەوە کردەوە کە لەوانەیە هەندێک دۆسیەی ئاڵۆزتر پێویستیان بە کاتی زیاتر هەبێت.
هێرشە بەرامبەرەکان
ویلایەتە یەکگرتووەکانی ئەمریکا شەوی سێشەممە چەند ئامانجێکی لە باشووری ئێران کردە ئامانج.
ئەم هەنگاوە دوای ئەوە هات کە سەرۆکی ئەمریکا ڕایگەیاند ئێران کۆپتەرێکی ئاپاچیی ئەمریکی لە گەرووی هورمز خستووەتە خوارەوە. بابەتێک کە گومانەکانی لەبارەی ئاسۆی ئاشتیی نێوان هەردوو وڵات زیاتر کرد.
لە بەرامبەردا، هێزەکانی ئێران بە هەڵدانی مووشەک و درۆن بەرەو بنکە سەربازییەکان لە کوەیت، بەحرەین و ئوردن کاردانەوەیان نیشان دا، هەرچەندە ڕاپۆرت درا کە سەرجەمیان ڕێگرییان لێ کراوە و تێکشکێنراون.
لە شەوی یەکشەممەوە تا بەیانی دووشەممەش پێکدادانی بەرامبەر لە نێوان ئێران و ئیسرائیل ڕووی دا، بەڵام دوای ئەوەی ترەمپ داوای لە هەردوو لا کرد دان بە خۆیاندا بگرن و گرژییەکان کەم بکەنەوە، هەردوو لا ڕاگرتنی هێرشەکانیان ڕاگەیاند.
ئەم پەرەسەندنی گرژییانە، هەوڵەکانی واشنتن و تارانی بۆ گەیشتن بە ڕێککەوتن بە مەبەستی کۆتاییهێنان بە جەنگەکە ئاڵۆزتر کردووە.