بەرەبەیانی ڕۆژی پێنجشەممە، ئێران داخستنی گەرووی هورمزی بەڕووی سەرجەم جۆرەکانی کەشتیدا ڕاگەیاند، لە هەنگاوێکدا کە بە وەڵامدانەوەیەکی ڕاستەوخۆ بۆ گورزە ئەمریکییەکانی ئەم دواییە وەسفی کرد، لە کاتێکدا ویلایەتە یەکگرتووەکان بەپەلە ڕاگەیەندراوەکەی ڕەتکردەوە و بە "بانگەشەیەکی درۆ" ناوی برد، جەختیشی لە بەردەوامیی جووڵەی دەریاوانی بە شێوەیەکی ئاسایی لەو گەرووە ستراتیژییەدا کردەوە.
ئاوێنە: بارەگای "خاتم الأنبياء"، کە بەرپرسە لە بەڕێوەبردنی ئۆپەراسیۆنە جەنگییەکان لەناو سوپای ئێراندا، ڕایگەیاند کە بڕیاری داخستنەکە سەرجەم کەشتییەکان دەگرێتەوە، لە نێویاندا نەوتهەڵگرەکان و کەشتییە بازرگانییەکان، هۆشداریشیدا لەوەی کە هەر هەوڵێک بۆ تێپەڕبوون ڕووبەڕووی تەقەکردن دەبێتەوە.
لەم چوارچێوەیەدا، هێزی دەریایی سوپای پاسدارانی ئێران جەختی لەوە کردەوە کە داخستنی گەرووەکە "تا کاتێکی نادیار" بەردەوام دەبێت، هەنگاوەکەشی بەوە پاساو هێنایەوە کە بە "پێشێلکارییە بەردەوامەکانی ئەمریکا بۆ مەرجەکانی ئاگربەست" وەسفیکرد.
فەرماندەی هێزی دەریایی پاسداران جەختی لەوە کردەوە کە هێزەکانیان "بە توندی مامەڵە" لەگەڵ هەر هەوڵێکی پەڕینەوەی کەشتییەکان دەکەن، و داوای کرد بە تەواوی خۆیان بەدوور بگرن لە تێپەڕبوون بە گەرووەکەدا لەپێناو پاراستنی سەلامەتییان.
هەروەها ئاماژەی بەوەدا کە داخستنی گەرووی هورمز دەرئەنجامی "نەمانی ئاسایشە بەهۆی دەستدرێژییەکانی ئەمریکاوە"، هۆشداریشیدا لەوەی کە نزیکبوونەوە لە ناوچەکە وەک "هاوکاریکردن لەگەڵ دوژمن" هەژمار دەکرێت.
لە پەیوەندی بەم بابەتەوە، فەرماندەی هێزی ئاسمانی و بۆشایی لە سوپای پاسداران ڕایگەیاند کە ئێران "ناوچەکە دەکاتە دۆزەخ بۆ ئەمریکییەکان" ئەگەر واشنتن لەسەر سیاسەتەکانی بەردەوام بێت.
تەلەفزیۆنی ئێران بڵاویکردەوە کە وێنەکانی مانگی دەستکرد نەبوونی جووڵەی هاتووچۆ لە گەرووەکەدا نیشان دەدەن، کە ئەمەش -بەپێی گێڕانەوەی ئێرانی- ڕەنگدانەوەی دەستپێکردنی جێبەجێکردنی مەیدانیی بڕیاری داخستنەکەیە.
"بانگەشەیەکی درۆ"
لە بەرامبەردا، فەرماندەیی ناوەندیی ئەمریکا (سێنتکۆم) بە توندی ڕاستی و دروستیی ڕاگەیەندراوەکەی ئێرانی ڕەتکردەوە، و جەختی لەوە کردەوە کە "بانگەشەکانی سوپای پاسداران سەبارەت بە داخستنی گەرووی هورمز ڕاست نین"، و پێداگری کرد لەسەر ئەوەی کە هاتووچۆی دەریایی بێ پچڕان بەردەوامە.
سێنتکۆم ڕوونیکردەوە کە کەشتییە بازرگانییەکان و نەوتهەڵگرەکان لە شەودا بەردەوام بوون لە چوونەژوورەوە و هاتنەدەرەوە لە گەرووەکە، هەروەها بانگەشەکانی ئێرانی سەبارەت بە هێرشکردنە سەر کەشتییەکی جەنگیی ئەمریکی لە ناوچەکەدا ڕەتکردەوە.
ئەم ئاڵۆزییەش دوای ئەوە دێت کە فەرماندەیی ناوەندیی ئەمریکا، ئێوارەی چوارشەممە، ئەنجامدانی گورزی نوێی بۆ سەر پێگەکان لە ناوخۆی ئێران ڕاگەیاند. لە بەیاننامەیەکدا ئاماژەی بەوەشکرد کە ئۆپەراسیۆنەکان بریتین لە "گورزی بەرگریی زیاتر" کە بە فەرمانی فەرماندەی گشتیی هێزە چەکدارەکان ئەنجام دراون.
فەرماندەیی ئەمریکا جەختی لەوە کردەوە کە هێرشەکان وەڵامێکن بۆ ئەوەی کە بە "دەستدرێژییەکی بێ پاساو و بەردەوام" لەلایەن ئێرانەوە دایناوە، ئەمەش دوای لێدوانەکانی پیت هێگسێت، وەزیری بەرگریی ئەمریکا هات، کە ڕایگەیاند وڵاتەکەی "هێرشی توند" دەکاتە سەر دامەزراوە سەرەکییەکان لە ناوخۆی ئێران.
پێشتریش واشنتن کۆتاییهاتنی سێ شەپۆلی هێرشی بۆ سەر ئامانجە ئێرانییەکان ڕاگەیاندبوو، وەک وەڵامێک بۆ خستنەخوارەوەی هێلیکۆپتەرێکی ئەمریکی و ئەو هێرشانەی کە کرابوونە سەر هێزەکانیان و کەشتییە بازرگانییەکان.
لای خۆیەوە، سوپای پاسدارانی ئێران ڕایگەیاند کە گورزە ئەمریکییەکان پێگەکانیان لە جاسک و سیریک و قشم کردووەتە ئامانج، کە بووەتە هۆی زیانگەیاندن بە تاوەرێکی پەیوەندییەکان و وێرانکردنی دامەزراوە ئاوییەکان، ئاماژەی بەوەشکرد کە هێزەکانیان لە ڕێگەی فڕۆکەی بێفڕۆکەوانەوە وەڵامیان داوەتەوە و پێگە سەربازییەکانی ئەمریکایان کردووەتە ئامانج، لە نێویاندا کەشتیگەلی پێنجەم لە بەحرەین و هەردوو بنکەی ئەزرەق لە ئوردن و عەلی سالم لە کوەیت.