ئاژانسی هەواڵی "رویتەرز" لە زاری چوار سەرچاوەی جیاوازەوە ئاشکرای کردووە کە دەوڵەتی ئیمارات رەزامەندی نیشانداوە لەسەر گەڕاندنەوەی چەندین ملیار دۆلاری بلۆککراو بۆ کۆماری ئیسلامی ئێران. بەپێی شیکاریی ئاژانسەکە، ئەم هەنگاوە وەک گۆڕانکارییەکی تەکتیکی نوێ لە پەیوەندییەکانی نێوان هەردوو وڵاتدا دێت، کە هاوکاتە لەگەڵ پەرەسەندنی گرژییەکان و هێرشەکانی ئەم دواییەی سەر کەشتی و وڵاتانی ناوچەی کەنداو.
هەڵوێستی فەرمی ئێران و روونکردنەوەی میدیاکانی تاران
ئاوێنە: سەرەڕای بڵاوبوونەوەی ئەم راپۆرتە لەلایەن رویتەرزەوە، لایەنی ئێرانی پێشوەختە ناوەڕۆکی ئەم زانیارییانەی رەتکردووەتەوە. لەم چوارچێوەیەدا، ئاژانسی هەواڵی "میهر"ی ئێرانی بڵاویکردەوە، تاران بە فەرمی رەتیدەکاتەوە هیچ بڕە پارەیەکی بلۆککراوی لەلایەن ئیماراتەوە پێگەیشتبێت. "میهر" ئاماژەی بەوەش کردووە کە لە ناوەندە میدیاییەکاندا دەنگۆی گەڕاندنەوەی بڕی سێ ملیار دۆلار بڵاوبووەتەوە، بەڵام پرۆسەی وەرگرتنەوەی پارەکە تا ئێستا بە کردەیی نەچووەتە بواری جێبەجێکردنەوە.
مەرجەکانی ئەمریکا بۆ بەدیهاتنی رێککەوتنەکە
ئەگەرچی پێشبینی دەکرێت لە چوارچێوەی رێککەوتنێکی نوێدا پارە بلۆککراوەکان بۆ تاران بگەڕێندرێنەوە، بەڵام لایەنی ئەمریکیش هاتووەتە سەر هێڵ. بەرپرسێکی باڵای ئەمریکی بە ئاژانسی رویتەرزی راگەیاندووە، جێبەجێکردنی ئەم هەنگاوە بەتەواوی بەستراوەتەوە بە رادەی پابەندبوونی ئێران بە بەڵێن و رێککەوتنە نێودەوڵەتییەکانەوە، و تا تاران پابەندی تەواوی خۆی نیشان نەدات، هیچ بڕە پارەیەکی پێ نادرێتەوە.