سەرۆک وەزیرانی عێراق لەگەڵ سەرکۆنەکردنی هێرشەکانی سەر هەولێر، هەڕەشەی ڕووبەڕووبوونەوەی ئەنجامدەرانیشی دەکات.
ئاوێنە: عەلی زەیدی، سەرۆک وەزیرانی عێراق پەیامێکی دەربارەی هێرشەکانی دوێنێ شەوی سەر هەولێر بڵاوکردەوە و ڕایگەیاند، لە سۆنگەی بەرپرسیارێتیی دەستووریمانەوە، بە توندی سەرکۆنەی ئەو هێرشە دەکەین کە لە ڕێگەی فڕۆکەی بێفڕۆکەوانەوە ئەنجامدرا و ئاسمانی شاری هەولێری لە هەرێمی کوردستانی عێراق بەزاند”.
وتیشی: “جەخت دەکەینەوە کە چاوپۆشی لەم هەوڵە تاوانکارییانە ناکەین، کە بە نائومێدییەوە دەیانەوێت زیان بە سەقامگیریی گەلەکەمان و ڕێڕەوە دڵنیاکەی لە بنیاتنانی دەوڵەت و ئاشتیی کۆمەڵایەتیدا بگەیەنن”.
عەلی زەیدی ڕایگەیاند، “دەزگا و پێکهاتە ئەمنییە تایبەتمەندەکانمان ڕاسپاردووە کە هەموو هەوڵێک بدەن، بە هەماهەنگی لەگەڵ هێزە ئەمنییەکانی هەرێم، بۆ گرتنەبەری هەر ڕێوشوێنێکی پێویست بە مەبەستی ڕێگریکردن لە دووبارەبوونەوەی ئەم هێرشانە و ڕووبەڕووبوونەوەی هەر کەس و لایەنێک کە هەوڵبدات زیان بە ئاسایشی کۆمەڵگەی بەڕێزی عێراقمان بگەیەنێت لە هەر شوێنێک بێت”.
دوێنێ شەو بە هەشت درۆنی بۆمبڕێژکراو هێرش کرایە سەر هەولێر و دژە تیرۆری کوردستان ڕایگەیاند، سەرجەمیان لەلایەن هاوپەیمانانەوە خراونەتەوە خوارەوە.