تیمی پڕۆژەی هەژماری من، لەبارەی سزادان و بێبەشکردنی بانکی گەشەپێدانی نێودەوڵەتی (IDB) له‌لایه‌ن وه‌زاره‌تی گه‌نجینه‌ی ئه‌مریكاوه رایدەگەیەنێت، ئەو بانکە لە پاییزی ساڵی رابردوەوە لە پڕۆژەکە دورخراوەتەوە و مووچەی هیچ فەرمانبەرێک له‌به‌رده‌م مەترسیدا نییە.
ئاوێنه: دوای ئەوەی بانکی گەشەپێدانی نێودەوڵەتی (IDB) لە ئەنجامدانی مامەڵە داراییەکان بە دۆلاری ئەمریکی بێبەش کرا، ئه‌مڕۆ هه‌ینی، تیمی پڕۆژەی هەژماری من لە رونكردنه‌وه‌یه‌كدا دڵنیایی دایە موچەخۆرانی هەرێمی کوردستان و رایگەیاند کە ئەو بڕیارە هیچ پەیوەندییەکی بە سودمەندانی پڕۆژەکەوە نییە.
لە رونکردنەوەکەی پڕۆژەی هەژماری مندا هاتوە، هەر لە مانگی ئەیلولی ساڵی 2025ەوە لە هەنگاوێکی پێشوەختەدا بانکی ناوبراو (IDB) لە پڕۆژەکە دورخراوەتەوە و سەرجەم ئەو مووچەخۆرانەی لەو بانکە هەژماریان هەبو، بۆ سەر بانکە مۆڵەتپێدراوەکانی دیکە گواستراونەتەوە. ئامانج لەو بڕیارەش پاراستنی شایستە داراییەکانی فەرمانبەرانی هەرێمی کوردستان بووە، تاوەکو بەردەوام بن لە ئەنجامدانی مامەڵە داراییەکانیان بە دۆلار و بەکارهێنانی کارتە بانکییەکانیان لە ناوخۆ و دەرەوەی عێراق بەبێ هیچ ئاستەنگێک.
هەروەها پڕۆژەی هەژماری من جەختی لەوە کردوەتەوە کە ئێستا بە هاوبەشی لەگەڵ حەوت بانکی فەرمی بەردەوامە لە پێشکەشکردنی خزمەتگوزارییەکان، کە سەرجەمیان بە تەواوی پابەندی رێسا، رێنمایی و یاساکانی بانکی ناوەندیی عێراق و پێوەرە نێودەوڵەتییەکانن.