وەزیری ناوخۆی حکوومەتی هەرێمی کوردستان ئاماژە بە بەردەوامیی هەماهەنگییە ئەمنی و هەواڵگرییەکانی نێوان هەولێر و بەغدا دەدات، هاوکات جەخت لەسەر درێژەدان بە هەنگاوە یاساییەکان بۆ رێکخستن و کۆنترۆڵکردنی چەکی بێمۆڵەت دەکاتەوە.
ئاوێنە: ئەمڕۆ پێنجشەممە، 29ـی تشرینی یەکەمی 2026، رێبەر ئەحمەد، وەزیری ناوخۆی حکوومەتی هەرێمی کوردستان، لە لێدوانێکدا بۆ ئاژانسی هەواڵیی عێراقی (واع)، تیشکی خستە سەر سروشتی پەیوەندییە ئەمنییەکانی نێوان هەرێمی کوردستان و حکوومەتی فیدراڵی و رایگەیاند کە کارکردنی هاوبەش لە دۆسیە ئەمنی و هەواڵگرییەکاندا بەردەوامە.
وەزیری ناوخۆی هەرێم روونی کردەوە، دوای تەواوبوونی رێکارەکانی پێکهێنانی حکوومەتی نوێی فیدراڵی و پەسەندکردنی هەردوو وەزیری ناوخۆ و بەرگری لەلایەن پەرلەمانی عێراقەوە، هەماهەنگییەکان چوونەتە قۆناخێکی نوێوە. ناوبراو ئاماژەی بەوەش دا کە لە ئێستادا پەیوەندییەکی پتەو لە نێوان دامەزراوەکانی هەرێم و دەزگا ئەمنی و هەواڵگرییەکانی عێراقدا بوونی هەیە.
لە بەشێکی دیکەی لێدوانەکەیدا و سەبارەت بە دۆسیەی چەکی بێمۆڵەت، رێبەر ئەحمەد ئاشکرای کرد کە پرۆسەی کۆنترۆڵکردن و رێکخستنی چەک لە هەرێمی کوردستان لە چوارچێوەی یاسایەکی تایبەتدا بەڕێوە دەچێت. گوتیشی، سەرباری رێکارە ناوخۆییەکان، هەرێمی کوردستان ئەندامێکی کارایە لە لیژنەی باڵای کۆنترۆڵکردنی چەک لەسەر ئاستی عێراق.
پەیوەندییە ئەمنی و سەربازییەکانی نێوان هەولێر و بەغدا لە چەند ساڵی رابردوودا پێشوەچوونی بەخۆیەوە بینیوە، کە ئامانج لێی پڕکردنەوەی ئەو بۆشاییە ئەمنییانە بووە لە ناوچە کوردستانییەکانی دەرەوەی ئیدارەی هەرێم دروست بوون. لەو چوارچێوەیەشدا، هەردوو لا چەندین ژووری ئۆپەراسیۆنی هاوبەشیان دامەزراندووە و دوو لیوای هاوبەشیشیان بۆ بەرەنگاربوونەوەی پاشماوەکانی چەکدارانی داعش لەو ناوچانەدا پێک هێناوە.
سەبارەت بە رێکارەکانی کۆنترۆڵکردنی چەک لە ناوخۆی هەرێمدا، لە ساڵی رابردووەوە حکوومەتی هەرێمی کوردستان هەڵمەتێکی فراوانی بۆ دەستبەسەرداگرتن و رێکخستنی چەکی بێمۆڵەت دەست پێ کردووە. بۆ ئەم مەبەستەش، وەزارەتی ناوخۆ چەندین بنکەی تایبەتی بۆ تۆمارکردنی چەکی هاووڵاتییان کردووەتەوە و وادەی دیاریکراویشی بۆ رادەستکردنی چەکە قورس و مامناوەندەکان داناوە. چاودێران ئەم هەنگاوە وەک هەوڵێک بۆ کەمکردنەوەی رێژەی تاوان و پاراستنی سەقامگیریی کۆمەڵگە دەبینن، کە هاوتەریبە لەگەڵ هەوڵەکانی حکوومەتی فیدراڵی بۆ سنووردارکردنی چەک لە دەرەوەی دامەزراوە فەرمییەکانی دەوڵەتدا.