ئاژانسی هەواڵی رۆیتەرز لەزاری چەند سەرچاوەیەکەوە بڵاویکردەوە، دۆناڵد ترەمپ، سەرۆکی ئەمریکا لە چەند رۆژی رابردوودا بە راوێژکارە باڵاکانی راگەیاندووە، ئەگەر ئەمریکا ڕووبەڕووی هیچ هاندەرێک یان هەنگاوێکی نوێی تاران یان حوسییەکانی یەمەن نەبێتەوە، رەنگە هێرشە سەربازییەکان بۆسەر ئێران رابگرێت.
ئاوێنە: رۆژی شەممە ئاژانسی هەواڵیی "رۆیتەرز" لە زاری سێ سەرچاوەی ئاگادارەوە ئاشکرایکرد "ترەمپ لەنێوان هەڕەشەی فراوانکردنی جەنگ بە هێرشی نوێ و هێورکردنەوەی گرژییەکاندایە".
سەرچاوەکان دەشڵێن "ترەمپ لە کۆبوونەوەکانیدا لەگەڵ راوێژکارانی ئاسایشی نیشتمانی و دوای وەرگرتنی زنجیرەیەک زانیاریی هەواڵگری، باسی لەوە کردووە، بیر لە "راگرتنی هێرشەکان دەکاتەوە" و هاوسۆزییشی بۆ هاوپەیمانەکانی لە ناوچەکە نیشانداوە کە داوایان لێکردووە نەگەڕێتەوە بۆ جەنگێکی سەرانسەری".
رۆژی هەینیش مارکۆ روبیۆ، وەزیری دەرەوەی ئەمریکا لە وتارێکدا لە کۆنگرەی نیشتمانیی پارێزەرانی کۆمەڵەی فیدراڵیست لە واشنتۆن، پشتیوانیی لە وتەکەی سەرەتای ئەم هەفتەیەی ترەمپ کرد کە وتبووی جەنگەکە "لەرووی سەربازییەوە بە کردەیی کۆتایی هاتووە".
وتیشی "لە راستیدا ئێستا ئەو ئازارە ئابوورییەی ئێمە بەسەر ئەو رژێمەدا دەیسەپێنین ئەوەندە گەورەیە کە هیچ پێویستییەک بە کردەی سەربازی نییە، چونکە زۆر لاوازمان کردوون؛ بەڵام پێموایە سەرکەوتن بریتییە لە دڵنیابوون لەوەی کە هەرگیز چەکی ئەتۆمییان نەبێت".
رۆبیۆ ئاماژەی بەوەشدا، ترەمپ زۆر بۆی ئاسان بووە مەترسیی بەرنامە ئەتۆمییەکەی ئێران پشتگوێ بخات و جەنگێکی نەخوازراو نەکات و بۆ سەرۆکی داهاتووی جێبهێڵێت، بەڵام بڕیاریدا چارەسەری بکات، هەربۆیە "ئەمە کارێکی سەختە و زۆرجار ئازاری ئابووری و شتی دیکەی لێدەکەوێتەوە، ئێمەش هەست بەوە دەکەین".