بەهۆی بەسەرچونی ماوەکەی و نەشیاوی بۆ بەکارهێنان، لیژنەی کۆگاکانی قائیمقامیەتی سلێمانی دەست بەسەر بڕێکی زۆر توتن (معسل)ـی نێرگەلەدا دەگرێت.

ئاوێنە: بەپێی راگەیەندراوێكی قائیمقامیەت، لەشکر حەمید، سەرۆکی لیژنە هاوبەشەکانی قائیمقامیەتی سلێمانی رایگەیاند: بەهۆی بەسەرچونی ماوەکەی و نەشیاوی بۆ کێشان، لەلایەن لیژنەی کۆگاکانەوە لەناوچەی راپەڕینی شاری سلێمانی دەست بەسەر زیاتر لە سێ هەزار کارتۆن توتنی نێرگەلەدا گیراوە.

وتیشی: بەپێی رێنماییە تەندروستییەکان ئەو توتنی نێرگەلەیەی بەسەردەچێت شیرینییەکە لەتوتنەکە جیادەبێتەوەو ناوەندێکی باشە بۆ گەشەکردنی بەکتریاو کەڕوکردن، ئەمەش زیانە تەندروستییەکەی بۆ بەکارهێنەرانی زیاتر دەکات.

رونیکردەوە: بەپێی تایبەتمەندی وەزارەتی بازرگانی عێراق، ئەو کاڵاوشمەک و خواردەمەنیانەی لەبازاڕەکاندا دەفرۆشرێن، پێویستە بەرواری دروستکردن و بەسەرچونی بەشێوەی لێزەر لەسەر لێبڵەکەی هەڵکۆڵرابێت و لەکاتی نزیکبونەوەی بەسەرچونیدا لەلایەن دوکان و بازرگانەکانەوە کۆبکرێتەوەو بە هاوڵاتیان نەفرۆشرێت، بەپێچەوانەوە دەستی بەسەردا دەگیرێت.

ئاماژەی بۆ ئەوەشکرد: بەفەرمانی قائیمقامی سلێمانی تەواوی ئەو توتنەی کە زیاترە لە 18 تۆن و دەستی بەسەردا گیراوە، لەناودەبرێت و خاوەنەکەشی روبەڕوی رێکاری یاسایی دەکرێتەوە.