بەڕێوەبەری پلاندانان و میلاکاتی وەزارەتی پێشمەرگە رایگەیاند، دوای یەکەکانی
پشتیوانی ۱و ۲، چوار لیوای
تر لەیەکەکانی ۷۰و ٨۰ دەخرێنە سەر
وەزارەتی پێشمەرگە، خشتەو لیستی میلاکات و تەشکیلاتی ئەو لیوایانە هاوشێوەی لیواکانی
پیادەی سەر بە وەزارەت رێکخراونەتەوە.
ئاوێنە: بەپێی
راگەیەندراوێكی وەزارەتی پێشمەرگە، ئەو وتانەی بەڕێوەبەری
پلاندانان و میلاکاتی وەزارەتی ئەمڕۆ
سێشەممە، لەمیانی دیدارو کۆبونەوەیەکدا هاتون، لەگەڵ کۆڵۆنێڵ مایک، گەورە راوێژکاری
سەربازی بەریتانیا لەکونسوڵخانەی ئەو وڵاتە لەهەولێر.
هەر لەمیانی کۆبونەوەکەدا، کە عەمید موعتەسەم، جێگری بەڕێوەبەری پلاندانان
و میلاکات ئامادەیبو، راوێژکاری باڵای سەربازی هێزەکانی بەریتانیا، ستایشی هەوڵەکانی
وەزارەتی پێشمەرگەو بەڕێوەبەرایەتی میلاکاتی وەزارەتی کرد، لە جێبەجێکردنی ئەرکەکەیان،
کە هاوتایە لەگەڵ بەرنامەی چاکسازی وەزارەت، وتیشی: هەوڵەکان جێگای بایەخی ئێمەو
هاوپەیمانانەو لەپشتگیری و هاوکارییەکانمان بۆ ئێوە بەردەوام دەبین.
بەڕێوەبەری میلاکاتی وەزارەت، جەختی لەسەر بەردەوامی رێکخستنەوەی هێزەکان و
رێكخستنەوەیان لە چوارچێوەی وەزارەتی پێشمەرگەدا كردەوە، کە هەنگاو بەهەنگاو و لەچەند
قۆناغێکدا جێبەجێ دەکرێت.
بەگفتۆگۆکردن لەسەر بەرنامەی داهاتوی رێکخستنەوەو یەکخستنەوەی هێزەکان و
گونجانیان لەگەڵ تەشکیلاتی سەربازی سەردەمیانە، کۆبونەوەکە کۆتایی هات.