شارەزایەكی كەشوهەوای هەرێم پێشبینی دەكات ئەو شەپۆلی خۆڵبارینەی كە ناوچە جیاجیاكانی هەرێمی كوردستانی گرتۆتەوەو كاریگەرییەكانی و وادەی كۆتاییهاتنی لە ناوچەیەكەوە بۆ ناوچەیەكی دیكە جیاواز بێت.
ئاوێنە: ئاراس جەبار، شارەزای كەشوهەوا، ئێوارەی ئەمڕۆ دوشەممە، لە راگەیەندراوێكدا وتی: ئەو شەپۆلی خۆڵبارینەی ناوچەكانی هەرێمی گرتۆتەوە تا کاتەکانی ئەمشەو کاریگەرییەکەی بەم شێوەیە ئەمێنێتەوە و سبەی بەرەبەیان تا ڕادەیەک کەمدەبێتەوە، بەڵام دوبارە سبەی سێشەمە لە كاتەکانی ئێوارە و شەو قۆناغێکی دیکەی خۆڵبارین دەستپێدەکاتەوەو چڕی بەراورد بە ئەمڕۆ کەمتر ئەبێت و زیاتر کاریگەری لەسەر ناوچەکانی پارێزگای کەرکوک و گەرمیان ئەبێت و لەناوچەکانی دیکەدا ئاستی خۆڵبارینەکە مامناوەند بۆ کەم ئەبێت.
ئەوەشی خستۆتەڕو كە لەکاتەکانی بەرەبەیانی چوارشەممە ئەم قۆناغەش کاریگەری کەمدەبێتەوەو لەناوچەکانی سنوری پارێزگای ھەولێر و دھۆک و راپەرین کۆتایی بە خۆڵبارین دێت .
ئاماژەی بەوەشداوە كە لەناوچەکانی سنوری پارێزگای سلێمانی و ھەڵەبجە و کەرکوک و گەرمیان بەگشتی لە بەرەبەیانی رۆژی پێنجشەممە بەیەکجاری کۆتایی بەم شەپۆلە خۆڵبارینە دێت و بەھۆی چالاکبونەوەی بای باکوری رۆژھەڵاتیش لە ناوچە شاخاوییەکانەوە ئاسمانی ھەرێم ساماڵ و رون ئەبێتەوە.