دەزگای ئاسایشی نیشتمانیی عێراق، ئەمڕۆ سێشەممە، دەستگیركردنی 24 كەسی بە تۆمەتی بانگەشەكردن بۆ حزبی بەعس لە پێنج پارێزگا راگەیاندو دەڵێت: 13 كەسیان لە پارێزگای كەركوك دەستگیركراون.

ئاوێنە: دەزگای ئاسایشی نیشتمانیی عێراق، لە راگەیەندراوێكدا ئاشكرایكرد، دوای بەدەستهێنانی زانیاریی هەواڵگریی ورد لەسەر بونی چالاكیی بانگەشە بۆ حزبی بەعسی قەدەغەكراو لە چەند ناوچەیەكی جیاجیای عێراق، مەفرەزەكانی دەزگاكەیان دەستیان كردوە بە هەڵمەتێكی بەرفراوان بۆ دەستگیركردنی تێوەگلاوان.

ئەوەشی خستۆتەڕو، دەستپێكی هەڵمەتەكەیان لە پارێزگای كەركوك بوەو تێیدا 13 تۆمەتبار دەستیگركراون كە بانگەشەیان بۆ حزبی بەعس كردوە.

بەپێی راگەیەندراوەكە، هەڵمەتەكەی دەزگای ئاسایشی نیشتمانیی عێراق، پارێزگاكانی بەغدا، ئەنبار، كەربەلاو نەینەواشی گرتۆتەوەو لەو چوار پارێزگایەش 11 تۆمەتبار دەستیگركراون كە هەندێكیان لەڕێگەی گرتەی ڤیدیۆییەوە ستایشی رژێمی پێشوی عێراقیان كردوەو هەندێكی دیكەشیان بڵاوكراوەی بانگەشەیان بۆ حزبی بەعس لە شوێنە گشتییەكان هەڵواسیوە.

بەگوێرەی راگەیەندراوەكە، ئەو 11 تۆمەتبارەی لەو چوار پارێزگایە دەستگیركراون، 4یان لە پارێزگای ئەنبار، 4ی دیكەیان لە پارێزگای نەینەوا، دوانیان لە پارێزگای بەغداو ئەویدیكەیان لە پارێزگای كەربەلا بون.

دەزگای ئاسایشی نیشتمانیی عێراق هێمای بۆ ئەوەش كردوە كە دەستگیركردنی ئەو كەسانە بەبڕیاری دادوەرو بەپشت بەستن بوە بە ماددەكانی یاسای قەدەغەكردنی حزبی بەعس ژمارە 32ی ساڵی 2016 و سەرجەم تۆمەتبارەكان رادەستی دادگا كراون بۆ گرتنەبەری رێكاری یاسایی بەرامبەریان.