ڕۆژنامەی سەباح-ی عێراقیی ڕایگەیاند، سەرەڕای نزیكبونەوەی كۆتایهاتنی ماوەی شەش مانگەكە كە هەرێم‌و ناوەند لەسەری رێككەوتون بۆ یەكلایكردنەوەی زۆرێك لەدۆسیە هەڵپەسێردراوەكان، بەڵام پرسەكان لەشوێنی خۆیانن لەوانە، مادەی (140)و یاسای نەوت‌و غازو موچەی فەرمانبەرانی هەرێم‌و پرسەكانی تریش.

شارەزایەكی سیاسەتی نێودەوڵەتی بەڕۆژنامەکەی وتوە، لەگەڵ ئەوەی حكومەتی سودانی كێشە گەورە هەڵپەسێردراوەكانی نێوان بەغداو هەولێری چارەسەركردوە، بەڵام حكومەتی هەرێم تائێستا پابەندنییە بەجێبەجێكردنی هیچ بڕیاڕێكی حكومەتی بەغدا.

ڕێگه‌ لەبەردەم هەولێر ئاوەڵایە بۆ جێبەجێكردنی ئەو ڕێككەوتنانە كە بەسودی دەشكێتەوە، لەسەر ئاستی دارایی‌و سەقامگیریی سیاسی، لەنمونەی (یاسای نەوت‌و غاز)و مادەی (پترۆدۆلار)، وێڕای یاساكانی تر كە لەبەرژەوەندی هەولێردایە.

باس لەوەشکراوە لەڕاستیدا هەولێر دەیەوێت تەواوی نەوتەكە بۆخۆی بەرێت، پشكیش لەبەغدا وەربگرێت، ئەم دۆخە ماوەی پێنج ساڵە لەبودجەكانی ڕابردودا درێژەی كێشا.

ئەو پرسە هەڵپەسێردراوانەی كە ماوەی شەش مانگی بۆ دابینكراوە، كاتێكی زیاتر دەخایەنێت، بەڵام مادەی (140) هیچ كاتێكی بۆ دیارینەكراوە، ئەوەش خۆی لەخۆیدا كێشەیە.

دەكرێت بەغدا فشار لەسەر هەولێر بكات بۆ جێبەجێكردنی رێككەوتنەكان، بەتایبەت كە بەغدا دەستی باڵای هەیەو ڕێگه‌ی زۆری بەدەستەوەیە بۆ ناچاركردنی هەولێر بەجێبەجێكردنی ئەو ڕێككەوتنانە.