محەمەد شیاع سودانی، سەرۆك وەزیرانی عێراق، ئەمڕۆ دوشەممە، لە بەغدا پێشوازیكرد لە وەزیری دەرەوەی سعودیەو دڵنیایی دایە كە رێگەنادەن خاكی عێراق بۆ هێرشكردنە سەر هیچ لایەنێك بەكاربهێنرێت.
ئاوێنە: بەگوێرەی راگەیەندراوێكی نوسینگەكەی، ئێوارەی ئەمڕۆ دوشەممە، محەمەد شیاع سودانی، سەرۆك وەزیرانی عێراق پێشوازیكردوە لە فەیسەڵ بن فەرحان، وەزیری دەرەوەی سعودیەو وەفدێكی یاوەری.
لە دیدارەكەدا باس لە پەیوەندییە دوقۆڵییەكانی هەردو وڵات و ئەو پرسانە كراوە كە جێی بایەخی هەردولان، لەگەڵ تاوتوێكردنی دوایین پێشهاتەكان لەسەر ئاستی نێودەوڵەتی و ناوچەكە.
بەگوێرەی راگەیەندراوەكە، لە دیدارەكەدا باس لە شەڕی ئیسرائیل و گروپە چەكدارەكانی فەلەستین كراوەو لێكەوتەكانی كراوە.
وەك لە راگەیەندراوەكەدا هاتوە، سودانی جەختی لەسەر هەڵوێستی نەگۆڕی عێراق كردۆتە لەبارەی ئاسایش و ئارامی خاكی وڵاتانی دراوسێ و پابەندبونی بە پرەنسیپەكانی دراوسێیەتی باش و بڕیارە نێودەوڵەتییەكان لەو روەوەو جەختیشی كردۆتەوە كە عێراق رێگەنادات خاكەكەی بۆ هێرشكردنە سەر هیچ لایەنێك بەكاربهێنرێت.