ئالان حەمەسەعید، وەزیری پەروەردەی هەرێم رایگەیاند، ئەمڕۆ سێشەممە لە بەغدا لەگەڵ سەرۆك وەزیرانی عێراق كۆبۆتەوەو لیستی مامۆستایانی وانەبێژیی هەرێمی كوردستانی رادەستكردوەو دەشڵێت، چاوەڕێی وەڵامی رەسمی حكومەتی عێراقین.
ئاوێنە: ئالان حەمەسەعید، لە راگەیەندراوێكدا وتی، ئەمڕۆ سێشەممە لە بەغدا سەردانی محەمەد شیاع سودانی، سەرۆک وەزیرانی عێراقی فیدراڵم کردو بە ئامادەبونی د. ئیبراهیم جبوری، وەزیری پەروەردەی عێراق و فارس عیسا، سەرۆکی نوێنەرایەتی حکومەتی هەرێمی کوردستان لە بەغدا، لەسەر چەند پرسێکی گرنگی پەروەردەیی گفتوگۆمان کرد .
ئاماژەی بەوەشداوە، لە کۆبونەوەکەدا نوسراوی فەرمی ئەنجومەنی وەزیرانی هەرێمی کوردستان و لیستی هاوپێچکراوی مامۆستایانی وانەبێژم پێگەیاند سەبارەت بەتەرخانی دارایی بۆ مامۆستایانی وانەبێژیی کوردستان و وەک حکومەتی هەرێمی کوردستان هەمو هەنگاوە پێویستەکانمان ئەنجامداوە و چاوەڕوانی دەرئەنجام و وەڵامی فەرمی حکومەتی عێراقی فیدراڵ دەکەین.
وەزیری پەروەردەی هەرێم وتوشیەتی، لە کۆبونەوەکەدا جەختمان کردەوە لەپشکی هەرێمی کوردستان لە دروستکردنی باڵەخانەی قوتابخانەکان لە رێککەوتنی عێراق-چین کە هەرێمی کوردستان تا ئێستا پشکی خۆی لە دروستکردنی ئەو قوتابخانانە نەچۆتە بواری جێبەجێکردنەوەو سەرلەنوێ نوسراوێکی دیکەمان پێشکەشکردن بەمەبەستی دابینکردنی پشکی هەرێمی کوردستان لە دروستکردنی باڵەخانەی پەروەردەیی نوێ .
بەپێی راگەیەندراوەكە، تەوەرێکی دیکەی کۆبونەوەکە تایبەت بو بە پرسی خوێندنی قوتابخانەکانی فیدراڵی لە هەرێمی کوردستان و بەردەوامبونی پرۆسەی خوێندن تیایاندا، لەوبارەیەوە هاریکاری و هەماهەنگی هەرێمی کوردستانمان نیشاندا بۆ بەردەوامبونی پرۆسەی خوێندنی قوتابیانی ئەو قوتابخانانە.