له‌سه‌روبه‌ندی دیاریكردنی واده‌ی هه‌ڵبژاردنه‌كانی ئه‌و وڵاته‌دا، حكومه‌تی هاوپه‌یمانیی ئوسترالیا پلانی بودجه‌ی ساڵی 2019 ی ڕاگه‌یاند كه‌ چه‌ند گۆڕانكارییه‌كی تایبه‌ت به‌ پرسی كۆچبه‌ران و ڤیزای ئوسترالیای له‌خۆگرتوه‌.

ئاوێنه‌: به‌گوێره‌ی پلانه‌كه‌، حكومه‌تی ئوسترالیا به‌نیازه‌ ساڵانه‌ و بۆ ماوه‌ی چوار ساڵی داهاتو كه‌ له‌ ساڵی 2019-2020 ده‌ستپێده‌كات، 160 هه‌زار كۆچبه‌ر وه‌ربگرێت، ئه‌وه‌ش له‌كاتێكدایه‌ كه‌ پێشتر ژماره‌ی كۆچبه‌رانی وه‌رگیراو ساڵانه‌ 190 هه‌زار كۆچبه‌ر بوه‌.

پشكی شێری ئه‌و ژماره‌یه‌ بۆ ئه‌و كۆچبه‌رانه‌یه‌ كه‌ به‌ كۆچبه‌ری شاره‌زا ناسراون و توانای پڕكردنه‌وه‌ی ئه‌و هه‌لی كارانه‌یان هه‌یه‌ كه‌ ئوسترالیا بۆ كۆچبه‌رانی بیانی ڕایگه‌یاندوه‌ و به‌شه‌كه‌ی تریشی ته‌رخانكراوه‌ بۆ یه‌كگرتنه‌وه‌ی خێزان و منداڵان.

هاوكات، حكومه‌تی ئوسترالیا بڕیاریداوه‌ به‌ زیادكردنی تێچوی پێشكه‌شكردن بۆ ڤیزای ئه‌و ووڵاته‌ به له‌سه‌دا 5.4 له‌ مانگی ته‌مموزی ئه‌مساڵه‌وه بۆ هه‌مو ئه‌و ڤیزایانه‌ی كه‌ به‌ ڤیزای (ٍsub-class) ناسراون و خاڵبه‌ندیش بۆ تاقیكردنه‌وه‌ی زمانی ئینگلیزی به‌جۆرێك ده‌ستكاری ده‌كرێت كه‌ له‌ به‌رژه‌وه‌ندی كۆچبه‌رانه‌.

پلانی ساڵانه‌ی وه‌رگرتنی كۆچبه‌ران له‌لایه‌ن حكومه‌تی ئوسترالیاوه‌ له‌ڕێگه‌ی پێشكه‌شكردنه‌وه‌ له‌لایه‌ن كۆچبه‌رانه‌وه‌ ئه‌نجام ده‌درێت و كۆچبه‌رانی نایاسایی ناتوانن سودمه‌ندی ئه‌م پڕۆگرامه‌ بن چونكه‌ ئوسترالیا له‌ئێستادا به‌رده‌وامه‌ له‌ سیاسه‌تی گرتن و دیپۆرتكردنه‌وه‌ی هه‌ر كۆچبه‌رێك یان په‌نابه‌رێك كه‌ بیه‌وێت به‌ قاچاخ و به‌ به‌له‌م ڕو له‌ ئوسترالیا بكات. 

سه‌رچاوه‌: ماڵپه‌ری هه‌واڵی ئێس بی ئێسی ئوسترالی