2021-03-02 1879
د. رەهێڵ فەرەیدون
شەوی رابردو 50 هەزار ڤاکسینی کۆرۆنای سینۆفارم لەچینەوە گەیشتە عێراق‌و لەو بڕەش پێنج هەزاری بۆ هەرێمی کوردستان دەبێت، بریکاری وەزارەتی تەندروستی-یش ده‌ڵێت، پێویست ناکات هاوڵاتیان دودڵبن لەڤاکسینەکە.
ئاوێنه: د. رەهێڵ فەرەیدون، بریکاری وەزارەتی تەندروستی هه‌رێم له‌باره‌ی ڤاکسینی کۆرۆنای سینۆفارم رایگه‌یاند، "ڤاکسینەکەی چین بەرێکاری تەندروستی رێکخراوی تەندروستی جیهانیدا تێپەڕیوەو پێویستە هاوڵاتیان دڵنیابن لەوەرگرتنی".
وتیشی، "هەشت سەنتەر لەهەرێمی کوردستان بۆ پێدانی ڤاکسینەکە دابینکراوە، ئەو سەنتەرانەش سیانیان لەسلێمانی و سێ لەهەولێرو دوو لەدهۆکە".
ئاماژه‌ی بۆ ئه‌وه‌شكرد كه پێکوتەکە سەرەتا دەدرێتە تیمە تەندروستییەکان و یەکەم کاروانی ڤاکسینەکە بەشی دوو هەزار کەس دەکات.
پێشتر ڕاگه‌یاندنی وه‌زاره‌تی ته‌ندوستی حكومه‌تی هه‌رێم ئاماژه بۆ ئه‌وه كردبو كه ئێواره‌ی ئه‌مرۆ سێشه‌ممه، ڤاکسینی دژی ڤایرۆسی کۆڕۆنا دەگاتە هەرێمی کوردستان‌و لەدەروازەی هەولێر نزیگ بازگەی شێراوە لەلایەن وەزیری تەندروستی وەردەگیرێت‌و پێشوازی لەتیمەكە دەكرێت.