حکومەتی عێراق بڕیاریداوە گۆشت‌و مریشک‌و هێلکە بەنرخی پاڵپشتیکراو بخاتە بازاڕەوە، بەڕێوەبەری گشتی بازرگانی حكومه‌تی هەرێمی كوردستان-یش ده‌ڵێت، بڕیارە پارێزگاکانی هەرێمیش بگرێتەوە.
ئاوێنه: هه‌فته‌ی ڕابردو وەزاره‌تی بازرگانی عێراق بڵاویكرده‌وه كه حکومەتی عێراق بڕیاریداوە گۆشت‌و مریشک‌و هێلکەو شیرو چەند مادەیەکی دیکەی خۆراکی بەنرخی پاڵپشتیکراو بخەنە بازاڕەوە.
ئەمڕۆ شەممە، نەوزاد کامیل، بەڕێوەبەری گشتی بازرگانی هەرێم رایگەیاند، حکومەتی عێراق بەنرخی پاڵپشتیکراو گۆشت بۆ پارێزگاکان دابیندەکات‌و بڕیارە پارێزگاکانی هەرێمیش بگرێتەوە.
بەڕێوەبەری گشتی بازرگانی هەرێم وتیشی، "نرخی هەر کیلۆیەک بەچوار هەزارو ٥٠٠ دینار دەبێت".
ئاماژەی بەوەشکرد، لیستی بازاڕو پێویستی هاوڵاتیان ئامادەکراوەو بۆ بەغدا نێردراوەو بەپێی ئەو لیستە بڕی گۆشتەکە بۆ هاوڵاتیانی هەرێم دابین دەکرێت.
وتیشی، " گۆشتەکە لەگەڵ پسوڵەی بەشە خۆراکدا نابێت و لەدوای گەیشتنی بۆ هەرێم هاوڵاتیان دەتوانن لەبازاڕەکاندا بەنرخی پاڵپشتیکراو بیکڕن".