کاتێک مرۆڤ دەستی دەکات بە کاری خێرخوازی، لە ڕوانگەی ئایین و فەلسەفەوە، تەنھا کارێکی دەرەکی ناکات، بەڵکو گەشتێکە بۆ ناو خۆی.
خێرخوازی ڕاھێنانێکە بۆ دڵ  بۆ  پاکبوونەوەی نیەت  وە بۆ نزیکبوونەوەی مرۆڤ بە مەعنای ڕاستەقینەی مرۆڤایەتی.
لە باوەڕی ئایینی دا چاکە ھەنگاوێکە بۆ ڕەزامەندی خودا و لە فەلسەفەدا ڕێگایەکە بۆ گەشەپێدانی ویژدان.
ئەو ئارامییەی کە لە دوای کارێکی خێر دێت  پاداشتێکی دەرونیە نەک ماددی.
ئەو پاداشتەیە کە پارە ناتوانێت بکڕێت و سامان ناتوانێت دابینی بکات، چونکە سەرچاوەکەی لە نیەتی پاک و دڵی ڕاستەقینەی مرۆڤەوە دێت.
مرۆڤ کاتێک یارمەتیدەدات، لە ڕاستیدا خۆی بەو  یادەوە دەھێنێت کە ئەو خۆی خەلقکراوە بۆ چاکە، نەک بۆ زیان.
لە فەلسەفەی ژیاندا مرۆڤ ئەو کاتە گەورە دەبێت کە خۆی بچووک دەبینێت.
خۆبەخشانە یارمەتیدان  نیشانەی تێگەیشتنی قووڵە بۆ ئەو ڕاستییەی کە ھەموومان لە پێویستی و ناتەواوی یەکسانین.
لە ئایینیشدا، خێرخوازی ئەو کاتە قبووڵ دەبێت کە بە دڵپاک و بێ چاوەڕوانی پاداشت ئەنجام بدرێت.
بەڵام خێرخوازی تەنھا پێدانی پارە یان شت نیە،،
خێرخوازی شێوازی مامەڵەیە، ڕێزی مرۆڤە، و ھێمنبوونە لەگەڵ ئەوانەی دەستیان بۆ یارمەتیدان درێژ کردووە.
منەت بارکردن یان شکاندنی دڵی ئەو کەسەی پێویستی پێیە، ڕۆحی خێرخوازی دەکوژێت و واتاکەی لێ دەسێنێت.
لە ڕوانگەی ئایینەوە، ئەو کەسەی یارمەتیدەدات و دڵی کەسێکی تر دەشکێنێت، لە ڕێگای چاکە دوور دەکەوێت، ھەرچەندە کارەکەی لە دەرەوە جوان دیار بێت.
و لە فەلسەفەدا  ئەو یارمەتیدانەی کە کرامەتی مرۆڤ تێک دەشکێنێت ڕەفتارێکی ناتەواوە  چونکە ئەخلاق تەنھا لە کرداردا نیە، بەڵکو لە شێوازی کردارەکەدایە.
لە کۆتاییدا، خێرخوازی پەیمانێکە نێوان دڵی مرۆڤ و خودا، و نێوان مرۆڤ و ویژدان.
ئەو کەسەی بە نیەتی پاک یارمەتیدەدات، پێویست ناکات ستایش بخوازێت، چونکە ئارامی دڵ و ڕووناکی ناوەوەی، گەورەترین پاداشتە.
 ئەوەی خێرخوازی دەکات بە ھێمنبوون و ڕێز، ئەوە بە ڕاستی خۆی خزمەت بە مرۆڤایەتی و باوەڕ دەکات،
کۆتاییدا، کاری خێرخوازی ئەو گەنجینەیەیە کە شوێنی لە دڵە، نەک لە ژێر گڵ..