پارتی چاكسازیی توركمان سوپاسی هەڵوێستەكەی پارتی و سەرۆكی ئەو حزبە دەكات بۆ بەشداری نەكردنیان لە هەڵبژاردنی پەرلەمانی كوردستان.
ئاوێنە: پارتی چاكسازیی توركمان، ئەمڕۆ دوشەممە، لە راگەیەندراوێكدا لەبارەی بڕیارەكەی پارتی بۆ بەشداری نەكردن لە هەڵبژاردنی پەرلەمانی كوردستان وتی، وەک پێکهاتەی تورکمان و پارتی چاکسازی تورکمان سوپاسی "هەڵوێستی نیشتیمانی"ی مەسعود بارزانی و پارتی دەکەین کە هەمو کات لە "سەنگەری بەرگری" بون لە "پاراستن و چەسپاندنی مافەکانی سەرجەم پێکهاتە جیاوازەکان لە هەرێمی کوردستان."
ئەو حزبە توركمانییە پێشی وایە پارتی و سەرۆكی پارتی "هەمیشە کاریان لەسەر پتەوبونی پێکەوەژیانی ئاشتیانەی نێوان پێکهاتەکان کردوە."
ئەوەش لەكاتێكدایە كە ئەمڕۆ دوشەممە، مەكتەبی سیاسی پارتی لە پاش كۆبونەوەی خۆی لە راگەیەندراوێكدا وتی، "بەبەرژەوەندی گەل و نیشتمانەکەمانی دەزانین كە پارتیمان نەچێتە ژێر باری پەسەندکردنی بریاری نادەستوریی و سیستەمێکی سەپێنراو لە دەرەوەی ئیرادەی گەلی هەرێمی كوردستان و دامەزراوە دەستورییەکانی و بەشداری هەڵبژاردنێک نەكات کە بە نایاسایی و نادەستوری و لەسایەی سیستەمێکی سەپێنراودا بەڕێوەبچێت."