وەزارەتى دەرەوەى ئەمریکا لە راگەیەنراوێکدا، پیرۆزبایى جەژنى نەورۆز  دەکات و دەڵێت، “لەوانە پیرۆز بێت بەهۆی ئەو جەژنەوە ئاهەنگ دەگێڕن.”

ئەمڕۆ چوارشەممە 20ی ئازار، وەزارەتى دەرەوەى ئەمریکا بەبۆنەی نەورۆزەوە راگەیەنراوێکی بڵاوکردووەتەوە و تیایدا هاتووە، “هیواخوازین جەژنى نەورۆز لەهەموو ئەوانە پیرۆزبێت، بەهۆى ئەو جەژنە و هاتنى وەرزى بەهار ئاهەنگ دەگێڕن”.

ئاماژەی بەوەکردووە، بە درێژایى چەندین سەدەیە گەلان لە سەرتاسەرى جیهاندا، لەوانەش ئێران و رۆژهەڵاتی ناوەڕاست، ئاسیای ناوەڕاست و باشوور و ئەوروپا بۆ ئاهەنگگێڕان بەهۆى نوێبوونەوەى سروشت و ساڵى نوێوە کۆدەبنەوە.

دەشڵێت “جەژنى نەورۆز دەرفەتێکى نوێیە بۆ پەیوەندییەکان و بەنرخ سەیرکردنى نیعمەتەکان، چاوەڕوانى ئەو دەرفەتانەیە داهاتوو لەگەڵ خۆیدا دەیانهێنێت.”

ئاشکرایکردووە، “هیواخوازن ساڵى نوێ ئاشتى زیاتر، تەندروستى باشتر، گەشەسەندن و خۆشى زیاتر بۆ جیهان بهێنێت”.