وەزارەتی دارایی هەرێم رایگەیاند، دوای چارەسەركردنی موچەی پێشمەرگەو هێزە ئەمنییەكان و تەواوكردنی رێكارەكانی ناردنی موچەی مانگی سێ، وەفدی هەرێم لە بەغداوە گەڕانەوە هەولێر.

ئاوێنە: وەزارەتی دارایی و ئابوریی هەرێمی كوردستان، كەمێك لەمەوبەر لە راگەیەندراوێكدا وتی "دوای ئەنجامدانی چەندین کۆبونەوەی گرنگ و سەرکەوتو لە گەڵ لایەنە پەیوەندیدارەکانی حکومەتی عێراق لە سەر پرسی بودجەو موچەی فەرمانبەران و موچەخۆرانی هەرێمی کوردستان و چارەسەرکردنی موچەی پێشمەرگەو هێزە ئەمنییەکان و تەواوکردنی ڕێکارەکانی ناردنی موچەی مانگی ئازاری فەرمانبەرانی هەرێمی کوردستان، شاندی هەرێمی کوردستان کۆتاییان بەسەردانەکەیان بۆ بەغدا هێناو گەڕانەوە هەرێمی کوردستان."

ئەوەش لەكاتێكدایە كە ئەمڕۆ وەزارەتی دارایی عێراق رایگەیاند، دەستمان كرد بە خەرجكردنی موچەی تەواوكاریی مانگی شوبات بۆ دامەزراوە ئەمنییەكانی هەرێمی كوردستان.

وەفدەكەی هەرێم ئێوارەی دوێنێ سێشەممە 2/4/2024، بەسەرۆکایەتی ئاوات شێخ جەناب، وەزیری دارایی و ئابوری هەرێمی کوردستان بەرەو شاری بەغدا بەڕێکەوت.

وەزارەتی دارایی هەرێم لە راگەیەندراوێكدا وتبوی، ئامانج لە سەردانەکە گفتوگۆکردنە لەگەڵ لایەنە پەیوەندیدارەکان لە حکومەتی فیدراڵی بۆ  چارەسەرکردنی پرسی بودجەو موچەی فەمانبەران و موچەخۆرانی هەرێمی کوردستان و ناردنی موچەی پێشمەرگەو هێزە ئەمنیەکانی هەرێمی کوردستان.