بڕیارە سبەی پێنجشەممە دەست بە دابەشكردنی موچەی مانگی 12ی ساڵی رابردوی مامۆستایانی وانەبێژ بكرێت.
ئاوێنە: عەلی رەئوف، نوێنەری گشتی مامۆستایانی وانەبێژ، ئەمشەو چوارشەممە، لە راگەیەندراوێكدا وتی، سبەی پێنجشەممە، دەست بە دابەشكردنی بە شایستە داراییەکانی مامۆستایانی وانەبێژ بۆ مانگی 12ی 2023 دەكرێت.
ئەوەشی خستۆتەڕو، سبەینێ، شایستە داراییەكانی مامۆستایانی وانەبێژ لە سنوری پەروەردەکانی رەواندز، چۆمان، ڕۆژهەڵات و ڕۆژئاوای دهۆک و سەرجەم پەروەردەکانی سلێمانی دابەش دەكرێت.
ئەوەش لەكاتێكدایە كە ئێوارەی ئەمڕۆ ئالان حەمەسەعید، وەزیری پەروەردەی هەرێمی كوردستان، لە راگەیەندراوێكدا وتی، سەبارەت بە شایستەی دارایی مامۆستایانی وانەبێژ، سەرۆکی حکومەتی هەرێمی کوردستان بڕیاریدا بەزوترین کات و پێش جەژن شایستە داراییەکانیان خەرج بکرێت.
ژمارەی مامۆستایانی وانەبێژ لە هەرێمی کوردستان 37 هەزار مامۆستای وانەبێژە، کرێی مانگانەیان نزیکەی 15 ملیار دینارە.
بەپێی رێنمایی ژمارە 14ی وەزارەتی دارایی هەرێم، ئەو مامۆستا وانەبێژانەی هەڵگری بڕوانامەی دبلۆمن مانگانە لەنێوان 250-350 هەزار دیناریان بۆ خەرج دەکرێت و بۆ هەڵگرانی بڕوانامەی بەکالۆریۆسیش 250-400 هەزار دینار خەرج دەکرێت.