وه‌زاره‌تی دارایی عێراق بڕیاریدا مووچه‌ی مانگی سێی فه‌رمانبه‌ران ره‌وانه‌ی هه‌رێمی كوردستان بكات، پێش جەژنى رەمەزانیش مووچەى فەرمانبەرانى مەدەنى دابەش دەکرێت.
سەرچاوەیەک لە بانکى ناوەندى عێراق/ لقى هەولێر بە میدیای گۆڕانی راگه‌یاند: لە کۆبونەوەى دوێنێی نێوان وەزارەتى دارایی عێراق و بانکى ناوەندى و شاندى هەرێم رێککەوتن کراوە کە هەموو مانگێک هەرێمى کوردستان لیستى فەرمانبەرانى هەرێم بنێرێت بۆ خەرجکردنى مووچەى فەرمانبەران تا ئەوکاتەى رێکارەکانى بەئەلیکترۆنیکردنى مووچەکان تەواو دەبێت.
ئاماژەى بۆ ئەوەشکردووە کە هەرکات مانگانە لیستى مووچەى فەرمانبەران گەیشتە وەزارەتى دارایی عێراق وردبینیان تێدا دەکرێت کە فەرمانبەرانى مەدەنى و خانەنشینان و چاودێرى کۆمەڵایەتیی دەگرێتەوە و بڕى پارەکەیان زیاتر لە 600 ملیار دینارە.
ئەوەشى ئاشکرا کرد کە دواى فەرمانبەرانى مەدەنى وردبینى لیستى هێزە ئەمنییەکان دەکرێت کە وەزارەتى ناوخۆ و پێشمەرگە و ئەنجومەنى ئاسایش دەگرێتەوە و بڕى پارەکەیان زیاتر لە 300 ملیار دینارە.
لەبارەى وادەى دابەشکردنى مووچەى مانگى سێ-ى فەرمانبەرانەوە ئەو سەرچاوەیەى بانکى ناوەندى عێراق وتی: "پارەکە بە دوو وەجبە دەگاتە هەرێم، گەیشتن و دابەشکردنى 48 کاتژمێرى دەوێت، بەوپێیە پێش جەژنى رەمەزان مووچەى فەرمانبەرانى مەدەنى دابەش دەکرێت".
لەبارەى دابەشکردنى مووچەى هێزە ئەمنییەکانیشەوە ئه‌و سه‌رچاوه‌یه باسی له‌وه‌كردووه، کە گەر تا رۆژى چوارشەممە وردبینى لە لیستەکەیان تەواو ببێت، مووچەکەیان دەگات، گەر نا دواى جەژن راستەوخۆ دەست بە دابەشکردنەکەى دەکرێت.