فەرماندەیی گشتیی هێزە چەکدارەکانی سووریا لە ڕاگەیەندراوێکدا بڵاویکردووتەوە، توانیویانە چەند ناوچەک لە سنووری شاری حەلەب لە دەستی گرووپە چەکدارەکان دەربهێننەوە؛ ئێرانیش هێرشی گرووپە چەکدارەکان سووریا بە پلانگێڕییەکی ئەمەریکا و ئیسرائیل دەزانێت.
ئاوێنە: لە ڕاگەیەندراوەکەدا هاتووە، سوپای سووریا لە هێرش و پێشڕەوییەکانی بۆ کۆنترۆڵکردنەوەی ئەو ناوچانە بەردەوامە کە لە چەند کاتژمێری ڕابردوو بەهۆی هێرشی گڕووپە چەکدارەکانی ئۆپۆزسیۆنی سووریا لە دەستیان دابوو.
هەروا ئاماژەیداوە، هێرشەکانی سوپای سووریا بۆ بەرپەرچدانەوە و تێکشکاندنی هێرشی گرووپە چەکدارەکان بەردەوامە و توانیویانە زیانێکی گەورە و کاریگەر لە گرووپە چەکدارەکان بگەیەنن.
بە گوێرەی ڕاگەیەندراوەکەی سوپای سووریا، گرووپە چەکدارەکانی ئۆپۆزسیۆن بە پشتیوانی چەکدارانی بیانی و بە چەکی هەمەجۆر و درۆن هێرشیان کردووتە سەر هێزەکانی سووریا، بەڵام ناوی هیچ وڵاتێکی نەهێناوە.
ئاماژەشیداوە، کە سوپای سووریا توانیویەتی بە سەدان چەکداری هێرشکەر بکوژێت و بریندار بکات.
هەر لە بارەی هێرشی گرووپە چەکدارەکانی سەر بە ئۆپۆزسیۆنی سووریا بۆ سەر سوپای ڕژێمی سووریا لە حەلەب، عەباس عراقچی وەزیری دەرەوەی ئێران بە تەلەفۆن لەگەڵ بەسام سەباغ وەزیری دەرەوەی سووریا قسەی کردووە و چالاک بوونەوەی گرووپە چەکدارەکانی ئۆپۆزیسیۆنی بە پلانێکی هاوبەشی ئەمەریکا و ئیسرائیلی ناوبردووە.
بە گوتەی عراقچی، ئیسرائیل دوای ئەوەی لە بەرانبەر بەرەی مقاوەمەی فەلەستین و لوبناندا شکستی هێناوە، لەگەڵ ئەمەریکا پلانی ئەوەیان داڕشتووە لە سووریا گرووپە چەکدارەکان چالاک بکەنەوە.
هەروەها بەسام سەباغ، وەزیری دەرەوەی سووریا جەختی لەوە کردووەتەوە، کە سوپای وڵاتەکەی بە هەموو توانا و هێزێکەوە بەرەنگاری گرووپە چەکدارەکانی دەبێتەوە و جارێکی دیکەش ڕێگەیان پێ نادات هیچ ناوچەکەیەک کۆنترۆڵ بکەن.