دلاوەر قەرەداغی
«تەلەفونە دەستییەکەم لە چاکەتەکەمدایە، ئەگەر پێویستت پێی نەبوو بیشکێنە و فڕێی دە، با نەکەوێتە دەست کەس، نامەوێت کەس بزانێ چەندە تەنها بووم!»
مامۆستا عینایەت؛ لە دوا ساتەکانی ژیانیدا بۆ ڕەسوڵ عەنبەر
لەم ڕۆژە قەرەباڵخانەدا شانازی خوێندنەوەی ڕۆمانی «مردنی مامۆستا عینایەت» م پێ بڕا. ڕۆمانێک کە دەستوبرد هەر لە بەراییەوە ئامادەی بۆ ژیان لەگەڵ یەکێ لە ڕۆمانە جوان و شایانەکانی تری کاک بەختیاردا کردم، ئامادەی کردم بیخوێنمەوە و هاوکات بەدەم گوێڕادێران لە سۆڵۆیەکی هەرە تەنیا و خەمگینەوە، تەپەتەپی دڵ و گڤەگڤی ڕەشەبا و چکەچکی نائومێدی و گژەگژەی تەنیایی بژنەوم، وچانێک بدەم و هێشتا چیرۆکەکە هەر تیامدا بژی و درێژەی هەبێ، لەگەڵمدا بژی و هەناسە بدا و هاوار بکات و ببزوێ، کتێبەکە تەواو بکەم و هێشتا مامۆستا عینایەت شەڵاڵ لە خوێنی خۆیدا لە حەوشەی زیندانە نهێنییەکە کەوتبێ، بەڵام دوور بە دوور سەرحەد غوڵام ببینم بە هەوای فڕین کەوتووەتە ڕاکردن و ئیدی بە دوایدا و لە دەوروبەریدا خەڵکانێکیش حەزی ڕاکردنیان تێدا بهەژێ و هەر ڕا بکەن و ڕا بکەن. ڕۆمانەکە بخەمەوە تاقی کتێبەکان و هەر بە خەیاڵی مامۆستا عینایەتەوە تەلەفزیۆنەکە داگیرسێنم و بە ڕێکەوت بەرنامە دوکیومێتارییەکەی ڕێکخراوی گوڵنار پرودوکشن لەبارەیەوە ببینم، کە تیایدا حەشاماتێک خەڵک هەر لە نەهاوەندی ژنی و و کوڕ و کچەکەی و عەمید خدر و یەڵدا هارون و دادوەر ئیحسان حەسۆ و سەگساری پەیجەکان و مەلا عەبدوڵڵای سەواح و تەنانەت فورات نەوڕسییش قسەی پێدەڵێن و هەر لەبەرئەوەی لە خۆیان ناچێ، گاڵتەی پێدەکەن و بۆی تێدەچێنن و درۆی بۆ هەڵدەبەستن.
«مردنی مامۆستا عینایەت» ژیاننامەی فەرمانبەرێکی بچووک و تەنیایە کە بە دڵی خۆی نەژیاوە، بێ هاوڕێ و بێکەس و تەنیایتەنیا، لەسەر ئەو شێوەژیانە تایبەتەی هەیەتی، لەسەر بێمنەتیی و لە دەرەوەی پۆل بوون و گۆشەگیرییەکەی، تەنانەت لە ماڵی خۆیشیدا دەبێتە جێگەی گومان و هەڕەشە و مەترسی و گلەوگازندەی ژن و کچ و کورەکەی..
«مردنی مامۆستا عینایەت» مانیفێستی بەرگرییە لە خۆبوون، لە تووڕەیی و ناڕازییبوون و ناچارنەبوون و دەستەمۆنەبوون، هاواری پارێزگارییە لە نەکوژانەوەی ترووسکەی هەرە ناوەوەی ڕەتکردنەوە و یاخیبوون.
وەک چۆن «مامۆستا عینایەت» خۆی تاقانەیە، حەکایەت و شێوازی گێڕانەوە و ئەفسوونی کەسێتییە چیخۆفییەکەی و تەنز و بێباکیی و بێدەنگییە قووڵەکانیشی تاقانەنە و کوردانەن و خودان جوانییەکی ناوازەن. جوانییەک کە نەمتوانی بەبێ نووسینی ئەم چەند دێڕە شپرزەیە، لامسەلایی بە لایدا ڕاببوورم.