دوابەدوای لێدوانێکی جەی دی ڤانس، جێگری سەرۆکی ویلایەتە یەکگرتووەکانی ئەمریکا، کە تێیدا جەنگی دژی ئێرانی وەک هۆکاری سەرەکیی شکستە سیاسییەکەی پارتی کۆمارییەکان لە هەڵبژاردنەکانی ناوەڕاستی خولدا دەستنیشان کرد، بەرپرسانی باڵای کۆماری ئیسلامیی ئێران کاردانەوەی توندیان نیشاندا و ئیدارەی واشنتنیان بە پاشکۆیەتی بۆ سیاسەتەکانی ئیسرائیل تۆمەتبار کرد.
ڕەخنە توندەکانی سەرۆکی پەرلەمانی ئێران
ئاوێنە: لە یەکەم کاردانەوەی فەرمیدا، محەمەد باقر قالیباف، سەرۆکی پەرلەمانی ئێران، هەڵسەنگاندنەکەی جێگری سەرۆکی ئەمریکای بە مامەڵەی "قومارچییەکی دۆڕاو کە توانای دوورکەوتنەوەی لە مێزی قومارەکە نییە" چواند. قالیباف ئاماژەی بەوە کرد کە لە ئێستادا ئیسرائیل ئامادەکاری بۆ قۆناغێکی نوێی ململانێ سەربازییەکان دەکات، لە کاتێکدا ویلایەتە یەکگرتووەکان لە لێواری ئەوەدایە بە تەواوی بچێتە ژێر باری ئەو ئاراستەیەوە و پشتیوانیی ڕەهای بکات.
سەرۆکی پەرلەمانی ئێران لە پەیامەکەیدا ڕووی دەمی کردە جەی دی ڤانس و ئیدارەی کۆشکی سپی و داوای لێکردن کە ئەو تێگەیشتنەیان لەسەر زیانەکانی جەنگ بگەیەننە تەلئەبیب. ناوبراو بە شێوازێکی ڕەخنەئامێز و وەک ئاماژەیەک بۆ کاریگەریی بنیامین نەتەنیاهۆ، سەرۆک وەزیرانی ئیسرائیل بەسەر بڕیارەکانی ئیدارەی ئەمریکاوە، نووسیویەتی: "بۆچی ئەم ڕاستییە بە سەرۆکەکەت ناڵێیت؟"
هەڵوێستی ئەنجومەنی باڵای ئاسایشی نەتەوەیی ئێران
هاوکات لەگەڵ ئەم لێدوانانەدا، موحسین ڕەزایی، لە ئەنجومەنی باڵای ئاسایشی نەتەوەیی ئێران، پێشوازیی لە پاشەکشەی پارتی کۆماریخوازی ئەمریکا کرد لە هەڵبژاردنەکاندا. ڕەزایی شەوی ڕابردوو لە هەژماری تایبەتی خۆی لە تۆڕی کۆمەڵایەتیی (ئێکس) ڕایگەیاند، گەلی ئێران توانیویەتی لەسەر دوو ئاست شکست بە دۆناڵد ترەمپ بهێنێت؛ چ لە ڕووی ستراتیژییەوە لە بەرەکانی جەنگ و ئاڵۆزییەکانی گەرووی هورمز، و چ لە ڕووی سیاسییەوە لە ناوخۆی واشنتن. ناوبراو جەنگە درێژخایەنەکەی بە هۆکارێک زانی کە وایکردووە هاووڵاتییانی ئەمریکا لە سندوقەکانی دەنگداندا باجی سیاسەتەکانی سەرۆکەکەیان بدەن.
ئەم لێدوانانەی بەرپرسانی تاران دوای ئەوە هاتن کە جەی دی ڤانس بە ڕاشکاوی دانی بەوەدا نا، کە تێوەگلان لە جەنگی ئێران و ئاستی هەماهەنگی و پشتیوانییەکانی ئیدارەی ئەمریکا بۆ ئیسرائیل، هۆکاری ڕاستەوخۆ بوون بۆ ئەوەی کۆمارییەکان زۆرینەی هەردوو ئەنجومەنی نوێنەران و پیران لە هەڵبژاردنەکانی ناوەڕاستی خولدا لەدەست بدەن.
کاریگەریی جەنگ و نرخی وزە لەسەر ئەنجامی هەڵبژاردنەکان
پێش بەڕێوەچوونی هەڵبژاردنەکان، زۆربەی ڕاپرسییە ناوخۆییەکانی ئەمریکا ئاماژەیان بە دابەزینی بەرچاوی ئاستی جەماوەریی دۆناڵد ترەمپ و پارتەکەی دەکرد. بەپێی شیکارییەکان، هۆکاری سەرەکیی ئەو ناڕەزایەتییە جەماوەرییە بۆ گرانبوونی بژێوی و بەرزبوونەوەی نرخی سووتەمەنی و نەوت دەگەڕێتەوە، کە دەرەنجامی ڕاستەوخۆی ئەو جەنگە بوو لە ٢٨ی شوباتدا لە نێوان ئێران لە لایەک و هاوپەیمانیی ئەمریکا و ئیسرائیل لە لایەکی دیکەوە هەڵگیرسا.
بەگوێرەی دەرەنجامە فەرمییەکانی هەڵبژاردنەکە، پارتی دیموکراتی ئەمریکا توانی کۆنتڕۆڵی هەردوو ئەنجومەنی کۆنگرێس (پیران و نوێنەران) لە چنگی کۆمارییەکان دەربهێنێتەوە:
لە ئەنجومەنی پیران: دیموکراتەکان توانییان ٥٤ کورسی مسۆگەر بکەن بەرامبەر بە ٤٤ کورسی بۆ کۆمارییەکان. لەم پرۆسەیەدا دیموکراتەکان سەرکەوتوو بوون لە بردنەوەی حەوت کورسیی هەستیار کە پێشتر لە دەستی کۆمارییەکاندا بوون، بەتایبەت لە ویلایەتە سەرەکییەکانی وەک تەکساس، کانزاس، ئۆهایۆ، کارۆلینای باکوور، کارۆلینای باشوور و ئایۆوا.
لە ئەنجومەنی نوێنەران: پارتی دیموکرات توانی بەربەستی ٢١٨ کورسی ببڕێت، کە ژمارەی پێویست بوو بۆ بەدەستهێنانی زۆرینەی پەرلەمانی و کۆنتڕۆڵکردنی ئەنجومەنەکە.