جێگری سەرۆکی ئەمریکا جەی دی ڤانس، لەپۆستێکیدا لەسەر پلاتفۆرمی ئێکس سەبارەت بە شکستی کۆمارییەکان لەهەڵبژاردنەکانی ناوەڕاستی خولدا، دەڵێت "شەڕی ئەمریکا لە ئێران ڕۆڵێکی گەورەی لە دۆڕانی کۆمارییەکاندا هەبووە".
ئاوێنە: ڤانس دەڵێت "هەموو کەس دەزانێت بۆچی دۆڕاوین، هەر گفتوگۆیەکی ڕاستگۆیانە سەبارەت بەوەی کە لەمەودوا دەبێ چ ڕێگایەک بگرینە بەر، پێویستە لێرەوە دەست پێبکات، هۆکاری دۆڕانمان شەڕ بوو".
ڤانس بە ئاماژەدان بە ڕاپرسییەکانی ئەم دواییە ئاماژەی بەوەدا کە ئەو پرسانەی کە بۆ دەنگدەرانی پێشووی ترامپ گرنگترینیان هەیە بریتین لە: کۆتاییهێنان بە شەڕ لەگەڵ ئێران، گرنگیدان بە هەڵاوسان و تێچووی ژیان، گرتنەبەری ڕێبازی "ئەمریکا یەکەم"و گۆڕینی پەیوەندییەکانی ئەمریکا لەگەڵ ئیسرائیل.
هەروەها جەی دی ڤانس ڕایگەیاند کە دۆناڵد ترەمپ سەرۆکی ئەمریکا پێی وایە بەهۆی ئێرانەوە دۆڕاون.
هاوکات لەفلۆریدا کە قەڵایەکی کۆمارییەکانە، ڕۆن دیسانتیس-ی فەرمانڕەوای ئەو ویلایەتە ڕایگەیاند کە پارتەکە بەئەندازەیەک تووشی شکست بووە "خەریکبوو لەناوچوونن".
دیسانتیس ئاماژەی بەوەدا کە ئەنجامەکان کاریگەرییەکی "گەورە"یان لەسەر سیاسەتی ئەمریکا دەبێت و بە "پێدەچێت خراپترین سیناریۆی سیاسی بۆ هەڵبژاردنی ناوەڕاستی خول" وەسفیکردو وتی "ئێمە دەمانزانی کە دەکرێت خراپتر بێت، بەڵام زۆربەمان پێشبینی ئەوەمان نەدەکرد کە بەم شێوەیە خراپ بێت".